Abhishek Ghosalkar Murder Case: अभिषेक घोसाळकर हत्या प्रकरणात मोठी अपडेट; सीबीआयने तपास हाती घेताच दाखल केला एफआयआर

अभिषेक घोसाळकर प्रकरणात तपासात त्रुटी राहिल्याचे सांगून ६ सप्टेंबर रोजी उच्च न्यायालयाने सीबीआयकडे हे प्रकरण वर्ग केले होते. पोलिसांनी व्यवस्थित तपास केला नसून या प्रकरणाच्या खोलात जाण्याची गरज आहे. अभिषेक घोसाळकर यांच्या पत्नी नगरसेविका तेजस्वी घोसाळकर यांनी दाखल केलेल्या जनहित याचिकेवर सुनावणी घेत असताना उच्च न्यायालयाने हा निर्णय दिला होता. मुंबई क्राइम ब्रँचने या प्रकरणाच्या सर्व कंगोऱ्याचा व्यवस्थित तपास केला नसल्याचे तेजस्वी घोसाळकर यांनी याचिकेच्या माध्यमातून सांगितले होते.

हे वाचा >> Photo : जनतेमध्ये रमणारं घोसाळकर दाम्पत्य; व्हॅलेंटाईनच्या दिवशी होता लग्नाचा वाढदिवस

उच्च न्यायालयाच्या निर्देशानुसार, सीबीआयने शुक्रवारी एफआयआर दाखल केला. एका किराणा मालाच्या दुकानदाराच्या तक्रारीनंतर बोरीवली पश्चिम येथील एमएचबी पोलीस ठाण्यात एफआयआर दाखल करण्यात आला. आयपीएस अधिकारी उपमहानिरीक्षक सायली एस. धुरत यांच्या नेतृत्वाखाली हा तपास केला जाणार आहे.

हत्येचा सर्व पैलूंनी आणि सर्वतोपरी तपास केल्याचा दावा मुंबई पोलिसांनी केला असला, तरी पुराव्यांचा विचार करता वास्तव वेगळे असल्याचे दिसून येते, असेही न्यायालयाने आदेशात म्हटले. या हत्येशी संबंधित संशयास्पद परिस्थितीचा चक्रव्यूह भेदला गेला नाही आणि हत्येच्या महत्त्वाच्या पैलूंचा तपास केला नाही, तर ती न्यायाची फसवणूक करण्यासारखे असेल. तपासातील त्रुटींकडे दुर्लक्ष केले जाऊ शकत नाही, अन्यथा न्याय नाकारला जाईल. त्यामुळे, पोलिसांनी तपास न केलेल्या पैलूंचा, एकूणच प्रकरणाचा सखोल तपास करण्याची आवश्यकता आहे, असेही न्यायालयाने आदेशात म्हटले.