मुंबई : महाराष्ट्र स्थावर संपदा प्राधिकरणाकडून (महारेरा) यापुढे गृहनिर्माण प्रकल्पांचे महारेरा प्रमाणपत्र आणि त्यासोबतचे परिशिष्ट वाचले तरी प्रकल्पाबाबतची मूलभूत आणि अत्यंत महत्त्वपूर्ण माहिती उपलब्ध होणार आहे . महारेराने नवीन गृहनिर्माण प्रकल्पांना द्यायच्या नोंदणी प्रमाणपत्रात ग्राहकांना प्रकल्पाबाबतची कुठली प्राथमिक माहिती अत्यावश्यक असते, हे लक्षात घेऊन ग्राहकाभिमुख अमुलाग्र बदल केले आहेत.
सर्व तपशील अंतर्भूत
या आधी जारी केलेल्या प्रमाणपत्रात फक्त प्रकल्प आणि प्रवर्तकाचे नाव, पत्ते एका ओळीत दिले जात होते. आता ही माहिती वाचायला आणि समजायला सोपी जावी यासाठी ठळक मुद्द्यांद्वारे देण्यात आली आहे. या शिवाय या प्रमाणपत्राच्या परिशिष्टात प्रकल्पाचे एकूण क्षेत्रफळ, इमारतीचे व विंग्सचे नाव किंवा क्रमांक, प्रकल्पातील निवासयोग्य मजले, प्रकल्पातील निवासी सदनिका आणि अनिवासी गाळ्यांची एकूण संख्या, इमारतीला किती मजल्यांपर्यंत परवानगी मिळाली आहे त्याचा तपशील दर्शवणारे अत्यंत महत्त्वाचे प्रारंभ प्रमाणपत्र, चारचाकी , दुचाकी आणि अभ्यागतांसाठी उपलब्ध एकूण पार्किंगची संख्या हा समग्र तपशील या प्रमाणपत्राच्या परिशिष्टात पहिल्यांदाच असणार आहे.
क्यूआर कोडही…
भविष्यात प्रवर्तकाने / विकासकाने प्रकल्पात
काही दुरुस्त्या केल्यास वा प्रकल्पाला मुदतवाढ घेतल्यास किंवा प्रकल्पाचे दुसऱ्या प्रवर्तकाकडे हस्तांतरण केल्यास तसा तपशीलही प्रमाणपत्रात नमूद केला जाणार आहे. सर्व प्रवर्तक हे प्रमाणपत्र प्रकल्पस्थळी, प्रकल्पाच्या संकेतस्थळावर ठळकपणे प्रदर्शित करीत असतात. प्रकल्पाच्या नोंदणी क्रमांकाच्या मदतीने प्रकल्पाबाबतची माहिती महारेराच्या संकेतस्थळावर शोधताना पहिल्याच पानावर या प्रमाणपत्राची लिंक असते. याशिवाय प्रकल्पाशी संबंधित टसर्व प्राथमिक माहिती क्यूआर कोडमध्ये देऊन सर्व माध्यमांतील जाहिरातींमध्ये प्रकल्पाच्या नोंदणी क्रमांकासोबत छापणे महारेराने यापूर्वीच बंधनकारक केले आहे. हा क्यूआर कोड स्कॅन करूनही प्रकल्पाशी संबंधित प्राथमिक माहिती मिळवता येऊ शकते.
महारेरा अध्यक्षांचे म्हणणे …
घर खरेदीदाराला कायदेशीरदृष्ट्या सक्षम करून या क्षेत्रात पारदर्शकता आणणारे अनेक निर्णय महारेराने घेतले असून त्यात प्रमाणित घर विक्री करार, घर नोंदणीपत्र, पार्किंगची लांबी, रुंदी, उंची , स्थळ शिवाय आश्वासित सेवा सुविधांच्या उपलब्धतेबाबत तपशील आदी बाबी अपरिवर्तनीय असल्याचे महारेराने यापूर्वीच जाहीर केले आहे. या निर्णयांचा घरखरेदीदारांना मोठ्या प्रमाणात उपयोग होत असून देशातील इतर अनेक विनियामक प्राधिकरणांनीही त्यांच्या क्षेत्रात या निर्णयांची अंमलबजावणी सुरू केले आहे. नोंदणी प्रमाणपत्रात वरील उपयुक्त माहिती समाविष्ट करण्याचा हा निर्णयही असाच ग्राहकांना चांगल्या प्रकारे मदत करणारा, पथदर्शक ठरणार असल्याचे मत महारेराचे अध्यक्ष मनोज सौनिक यांनी व्यक्त केले आहे.