MNS Leader Son : सोशल मीडिया इन्फ्लुएन्सर राजश्री मोरे सध्या चांगलीच चर्चेत आली आहे. दोन दिवसांपूर्वी तिने एक व्हिडीओ पोस्ट केला होता. मराठी माणसांना आधी मेहनत करायला शिकवा असं ती त्यात म्हणत होती. ज्यावरुन तिला ट्रोल केलं गेलं, तिच्या विरोधात ओशिवरा पोलीस ठाण्यात मनसेने तक्रार केली. ज्यानंतर तिने हा व्हिडीओ डिलिट केला. तसंच नवा व्हिडीओ पोस्ट करत आपले शब्द मागे घेतले. याच राजश्री मोरेने आणखी एक व्हिडीओ पोस्ट केला आहे. मनसेच्या पदाधिकाऱ्याच्या मुलाने आपल्याला कशी शिवीगाळ केली हे राजश्री मोरे यात सांगते आहे. तसंच हा मुलगा अर्धनग्न अवस्थेत धिंगाणा घालत होता असंही तिने सांगितलं आहे.

काय घडली घटना? व्हायरल व्हिडीओत काय?

रविवारी रात्री राजश्री मोरेच्या कारचाअपघात झाला. महाराष्ट्र नवनिर्माण सेनेचे नेते जावेद शेख यांचा मुलगा राहिल शेख मद्यपान करून गाडी चालवत होता आणि त्यामुळे हा अपघात झाल्याचा आरोप तिने केला आहे. या घटनेनंतर राजश्रीने सोशल मीडियावर एक व्हिडीओ पोस्ट केला. या व्हिडीओमध्ये राहिल अर्धनग्न अवस्थेत तिच्यावर आक्रमकपणे शिवीगाळ करताना दिसून येत आहे. यामध्ये तो तिला धमकी देतानाही दिसतोय. “xxx पैसे घे. जा आणि पोलिसांना सांग.. मी जावेद शेखचा मुलगा आहे. मग काय होईल ते तुला दिसेल”, अशी धमकी त्याने राजश्रीला दिली.

पोलिसांशीही आक्रमकपणे वागताना दिसतो आहे जावेद शेख यांचा मुलगा

व्हिडीओमध्ये तो मुलगा घटनास्थळी असलेल्या पोलीस अधिकाऱ्यांशीही वाद घालताना दिसतोय. पोलिसांना कुठलंही सहकार्य करण्यास नकार देतो आणि त्यांच्याशी आक्रमकपणे वागतो हे दिसून येतं आहे. या प्रकरणी राजश्रीने राहिलविरोधात एफआयआर दाखल केली असून त्याची कॉपीसुद्धा तिने सोशल मीडियावर शेअर केली आहे. राहील दारुच्या नशेत गाडी चालवत होता आणि वडिलांच्या राजकीय पदावरून धमकी देत होता, असा आरोप तिने केला आहे. इतकंच नव्हे तर एफआयआर दाखल केल्यानंतर मनसे कार्यकर्त्यांकडून सतत धमक्या मिळत असल्याचं तिने म्हटलंय. राजश्रीने पोस्ट केलेल्या व्हिडीओवर नेटकऱ्यांच्या विविध प्रतिक्रिया येत आहेत.

लोकांच्या प्रतिक्रिया काय?

याची उतरली असेल तर आता याला व्हिडीओ दाखवा आणि राज ठाकरेंसमोर उभं करा. तू बरोबर वागलीस राजश्री, याला धडा शिकव असं काही युजर्सनी म्हटलं आहे. काही युजर्सनी ताई त्याला काही होणार नाही अशीही कमेंट केली आहे. राजकीय लोक आणि त्यांच्या कुटुंबांसाठी आपल्याकडे काही कायदा नाही असंही काही जण म्हणत आहेत. राजश्री मोरेने पोस्ट केलेल्या या व्हिडीओवर विविध प्रतिक्रिया येत आहेत.