बोरिवलीत गगनचुंबी इमारतीत आग; धुरामुळे चार जण गुदमरले, वृद्ध दगावला

बोरिवली पूर्व परिसरातील मागाठाणे मेट्रो स्थानकासमोरील कनाकिया समर्पण टॉवरमध्ये ही आग लागली होती. शॉर्ट सर्कीटमुळे लागलेली आग २२ मजली इमारतीच्या पहिल्या ते सहाव्या मजल्यापर्यंतच्या इलेक्ट्रिक डक्टमध्ये पसरली होती. अग्निशमन दलाच्या जवनानांनी घटनास्थळी पोहोचून तातडीने मदतकार्य हाती घेतले. जवानांनी अवघ्या अर्ध्या तासात ही आग विझवली. मात्र आगीमुळे इमारतीत धुराचे साम्राज्य पसरले होते. त्यामुळे चार जणांना श्वासोश्चवास घेण्यास त्रास होऊ लागला. त्यांना तातडीने रुग्णालयात दाखल करण्यात आले. मात्र वृद्ध महेंद्र शहा यांना रुग्णालयात दाखल करण्यापूर्वीच त्यांचा मृत्यू झाल्याचे डॉक्टरांनी घोषित केले. तर अन्य तीन जणांची प्रकृती स्थिर आहे.

हेही वाचा…मुंबई : अक्सा किनाऱ्यावरील समुद्री पदपथ खचला, नागरिकांना प्रवेशबंदी

दरम्यान, मुंबईत दिवसभरात ९ ठिकाणी शॉर्ट सर्किटच्या घटना घडल्याच्या तक्रारी पालिकेच्या आपत्कालीन विभागाकडे आल्या. संबंधित विद्युत पुरवठा यंत्रणांना कळवून मदतकार्य रवाना करण्यात आल्याची माहिती पालिका प्रशासनाने दिली.