शाळांच्या उपाहारगृहामध्ये जंकफूडच्या विक्रीवर आता निर्बंध येणार असून कमी पोषणयुक्त पदार्थाची शाळेच्या आवारात कोणत्याही स्वरूपात जाहिरात करण्यासही बंदी असेल. बालकांमधील वाढत्या स्थूलतेवर नियंत्रण आणण्याच्या दृष्टीने कायद्यामध्ये सुधारणा करण्यासाठी अन्न सुरक्षा आणि मानके प्राधिकरणाने मसुदा जाहीर केला आहे.
या मसुद्यानुसार, शाळेच्या आवारात पोषणयुक्त पदार्थाना प्रोत्साहन दिले जावे. शाळेसाठी निधी उभारण्यासाठीचे उपक्रम, शैक्षणिक साहित्य, शाळेची मालमत्ता, शाळेमधील कोणतेही शैक्षणिक कार्यक्रम यामधून कमी पोषणयुक्त पदार्थाचे वितरण, विक्री करू नये. तसेच या पदार्थाच्या बॅ्रण्डचे नाव, लोगो या माध्यमांतून शाळेच्या आवारात प्रसिद्धीही केली जाऊ नये याची खबरदारी शाळा प्रशासनाने घ्यावी. शाळेत विविध पोषक अन्नपदार्थ उपलब्ध असतील, यासाठी शाळा प्रशासनाने उपाहारगृहाचे वेळापत्रक तयार करावे. एकदा वापरलेल्या तेलाचा वापर शक्यतो पुन्हा करू नये. शाळेतील उपाहारगृहावर देखरेख करण्यासाठी शाळा प्रशासनाने समन्वयकाची नेमणूक करावी. राज्य अन्न सुरक्षा विभागानेही उपाहारगृहांची वारंवार तपासणी करावी. हा कायदा देशभरातील सर्व बोर्डाच्या शाळा, निवासी शाळा आणि पाळणाघर यांना लागू असेल.