मुंबई : नायर रुग्णालयामध्ये कंत्राटी पद्धतीने कार्यरत असलेल्या वैद्यकीय अधिकाऱ्यांनी सोमवारी अचानक काम बंद आंदोलन पुकारले. कंत्राटी पद्धतीने कार्यरत असलेल्या या वैद्यकीय अधिकाऱ्यांनी त्यांचे नियमितीकरण करणे, समान काम समान वेतन त्याचबरोबर सातवा वेतन आयोग, दिवाळी बोनस आदी विविध मागण्यांसाठी सोमवारी काम बंद आंदोलन केले.
नायर रुग्णालयामध्ये मागील अनेक वर्षांपासून सात सहाय्यक वैद्यकीय अधिकारी (एएमओ) कंत्राटी पद्धतीने कार्यरत आहेत. या वैद्यकीय अधिकाऱ्यांना अनेक सोयी-सुविधा मिळत नसल्याने त्यांना विविध त्रासाला सामोरे जावे लागते. या समस्येकडे रुग्णालय प्रशासनाचे लक्ष वेधण्यासाठी सहाय्यक वैद्यकीय अधिकाऱ्यांनी सोमवारी सकाळी काम बंद आंदोलन केले. यावेळी त्यांनी दोन वर्षांपासून अधिक काळ कंत्राटी पद्धतीने कार्यरत असलेल्या सहाय्यक वैद्यकीय अधिकाऱ्यांना नियमित करावे, २०१६ पासून आतापर्यंत थकबाकीसह सातव्या वेतन आयोगाची अंमलबजावणी करून दिवाळी बोनस द्यावा, केईएम, शीव व नायर या तिन्ही रुग्णालयांमधील सहाय्यक वैद्यकीय अधिकाऱ्यांच्या सेवांमध्ये एकसमानता आणण्याबरोबरच त्यांना समान वेतन द्यावे, अपघाती वैद्यकीय अधिकारी (सीएमओ) यांच्यासाठी निवासाची व्यवस्था करावी, अयोग्य वातावरण, कामाचा अतिरिक्त ताण, कार्यालयासाठी अपुरी जागा, स्वतंत्र स्वच्छतागृहाचा अभाव, तसेच प्रत्येक महिन्याच्या १ तारखेला वेतन बँक खात्यामध्ये जमा व्हावे या मागण्यांसाठी नायर रुग्णालयातील सात सहाय्यक वैद्यकीय अधिकाऱ्यांनी सोमवारी काम बंद आंदोलन पुकारले होते.
हेही वाचा – दाऊदवरील विष प्रयोगाचे वृत्त अफवा, गेल्या आठवड्यात दाऊद तपासणीसाठी रुग्णालयात
हेही वाचा – मुंबई : सांताक्रुझमध्ये हॉटेलला आग
यामुळे अत्यावश्यक विभागामधील काम ठप्प होऊ नये यासाठी रुग्णालय प्रशासनाने तातडीने सहाय्यक वैद्यकीय अधिकाऱ्यांच्या जागी निवासी वैद्यकीय अधिकाऱ्यांची नेमणूक करण्याचा निर्णय घेतला. त्यामुळे या आंदोलनाचा आरोग्य सेवेवर फारसा परिणाम झाला नसल्याची माहिती नायर रुग्णालयाचे अधिष्ठाता डॉ. सुधीर मेढेकर यांनी दिली.