मुंबई : अमली पदार्थ प्रतिबंधक तसेच तस्करी कायद्यान्वये जप्त करण्यात आलेल्या आंतरराष्ट्रीय दहशतवादी दाऊद इब्राहिम याच्या तसेच कुटुंबीयांच्या मालकीच्या चार मालमत्तांचा ४ नोव्हेंबल रोजी पुन्हा लिलाव जाहीर करण्यात आला आहे. या मालमत्तांच्या लिलावातून फक्क २० लाख रुपये येतील, असा अंमलबजावणी यंत्रणांचा दावा आहे.

दाऊदच्या मालमत्ता खरेदी करण्यासाठी फारसे कुणी पुढे येत नसल्याचा या यंत्रणांचा अनुभव होता. मात्र २०१७ नंतर लिलाव जाहीर झाल्यानंतर प्रतिसाद मिळू लागला. आतापर्यंत दाऊद व कुटुंबीयांच्या मालमत्तांचा लिलाव यशस्वी झाला आहे. परंतु खेडमघील या मालमत्तांच्या लिलिवाला प्रतिसाद मिळत नव्हता. त्यामुळे पुन्हा लिलाव करण्यात येणार असून सीलबंद पत्रास निविदा मागविण्यात आल्या आहेत. त्यामुळे गोपनीयता राहील, असा विश्वास व्यक्त केला जात आहे. यावेळी या मालमत्तांचा लिलाव पूर्ण करण्याचा यंत्रणांचा प्रयत्न आहे.

खेडमधील १७१ चौरस मीटर शेतजमिनीसह उर्वरित अनुक्रमे दहा हजार ४२० चौरस मीटर तसेच आठ हजार ९५३ चौरस मीटर भूखंडांसह दोन हजार २४० चौरस मीटर अशा २० लाख आरक्षित किमत असलेल्या भूखंडांचा लिलाव होणार आहे. तस्करी आणि परकीय चलन नियमन ( मालमत्ता जप्त करणे) म्हणजेत साफेमा कायद्यानुसार ही मालमत्ता जप्त करण्यात आली आहे.

हेही वाचा

दाऊद कुटुंबीयांच्या मालकीच्या एका दुकानाचा प्राप्तीकर विभागाने २००१ मध्ये लिलाव केला होता. त्यावेळी कुणीही पुढे आले नाही. पुन्हा लिलाव झाला तेव्हा उत्तर प्रदेशातील एका व्यापाऱ्याने रस दाखविला. लिलावात हे दुकान त्यांनी खरेदी केले. परंतु या दुकानाचा त्यांना अद्याप ताबा मिळालेला नाही. हे दुकान दाऊदच्या हस्तकाच्या ताब्यात असून तो ताबा द्यायला तयार नाही. प्राप्तीकर विभागानेही हात वर केले आहेत. या दुकानाच्या ताब्यासाठी आता न्यायालयीन लढाई सुरु आहे. गेल्या वर्षी न्यायालयाच्याच हस्तक्षेपामुळे ही मालमत्ता सदर व्यापाऱ्याच्या नावे झाली.

आतापर्यंत झालेले लिलाव :

१४ नोव्हेंबर २०१७ : दक्षिण मुंबईतील तीन मालमत्तांचा लिलाव होऊन सैफी बुऱ्हाणी अपलिफ्टमेंट ट्रस्टने ११.०५ कोटींना त्या खरेदी केल्या.

९ ॲागस्ट २०१८ : मसुल्ला बिल्डिंग (अमीना मॅन्शन) सैफी बुऱ्हाणी अपलिफ्टमेंट ट्रस्टने साडेतीन कोटी रुपयांत खरेदी केली.

१ एप्रिल २०१९ : दाऊदची बहिण हसीना पारकर हिचा नौपाडा येथील ६०० चौरस फुटाचा फ्लॅट १.८ कोटींना लिलावात विकला गेला.

१० नोव्हेंबर २०२० : दाऊदचे वडिलोंपार्जित घर तसेच खेडमधील सहा मालमत्तांचा २२.८ लाखांना लिलाव झाला.

५ जानेवारी २०२४ : खेडमधील दाऊदच्या कुटुंबीयाचा भूखंड ३.२८ लाखांना लिलावात दिल्लीतील अजय श्रीवास्तव यांनी खरेदी केला.