नागपूर : शहीद आयपीएस अधिकारी हेमंत करकरे यांच्यासंदर्भात केलेल्या वक्तव्यावरून भाजपच्या विधि सेलच्या पदाधिकाऱ्यांनी काँग्रेस नेते विजय वडेट्टीवार यांच्याविरोधात सीताबर्डी पोलीस ठाण्यात तक्रार केली. सेलचे महानगर अध्यक्ष ॲड. परीक्षित मोहिते यांनी ही तक्रार दाखल केली. तक्रारीनुसार, वडेट्टीवार यांनी करकरे यांच्या मृत्यूमागे राष्ट्रीय स्वयंसेवक संघ व भाजपचा हात असल्याचा आरोप केला.

आर्काइव्हमधील सर्व बातम्या मोफत वाचण्यासाठी कृपया रजिस्टर करा

हेही वाचा >>> काँग्रेस आमदार विकास ठाकरेंचा गंभीर आरोप, निवडणूक रोखे खरेदीशी संबंधित कंपनीला कंत्राट?

तसेच भाजप व भाजपचे उमेदवार ॲड. उज्ज्वल निकम देशद्रोही असल्याचा आरोपदेखील वडेट्टीवार यांनी केला. वडेट्टीवार यांनी असे वक्तव्य करून आचारसंहितेचा भंग केला असून समाजात तेढ निर्माण करण्याचा प्रयत्न केला आहे. त्यामुळे त्यांच्याविरोधात गुन्हा दाखल करण्यात यावा अशी मागणी तक्रारीतून करण्यात आली आहे. वडेट्टीवार यांच्याविरुद्ध तक्रार प्राप्त झाली असून ती तक्रार मुंबई पोलिसांकडे वर्ग करण्यात येणार आहे, अशी प्रतिक्रिया सीताबर्डीचे ठाणेदार आसाराम चोरमोले यांनी दिली.

Nagpur News (नागपूर / विदर्भ न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Bjp complaint against congress leader vijay wadettiwar in over hemant karkare remark adk 83 zws