भंडारा : सोनोग्राफीसाठी आलेल्या एका सतरा वर्षीय अल्पवयीन मुलीवर एका डॉक्टरने अनैतिक वर्तन केल्याची धक्कादायक घटना उघडकीस आली आहे.साकोली शहरातील श्याम हॉस्पिटलमध्ये ही घटना घडली. मुलगी आपल्या आईसोबत उपचारासाठी हॉस्पिटलमध्ये आली होती. डॉक्टर देवेश अग्रवाल यांनी आई व नर्सला बाहेर बसवून रुग्ण मुलीसोबत सोनोग्राफी रूममध्ये तब्बल अर्धा तास एकांतात अनैतिक कृत्य केले, असा गंभीर आरोप आहे. घडलेली घटना पीडितेने आई-वडिलांना सांगितल्यानंतर साकोली पोलीस स्टेशनमध्ये तक्रार दाखल करण्यात आली असून, आरोपी डॉक्टर फरार आहे.
फिर्यादी महिलेने दिलेल्या तक्रारीनुसार, तिची मुलगी फेब्रुवारी २०२५ मध्ये पॅनिक अटॅकमुळे आजारी होती. उपचारासाठी तिला श्याम हॉस्पिटलमध्ये दाखल करण्यात आले होते. यानंतर काही वैद्यकीय त्रास पुन्हा उद्भवल्याने ९ जुलै रोजी सकाळी १० वाजता ती तिला उपचारासाठी डॉक्टर देवेश अग्रवाल यांच्याकडे घेऊन आली.
डॉक्टरांनी सोनोग्राफी आवश्यक असल्याचे सांगून आई व नर्सला बाहेर थांबण्यास सांगितले. त्यानंतर सोनोग्राफीच्या नावाखाली डॉक्टरने पीडित मुलीच्या कपड्यांवरून हात लावून तिच्या शरीराशी गैरवर्तन केले, असा आरोप करण्यात आला आहे. याप्रकरणी पीडित मुलीने रुग्णालयाच्या बाहेर निघाल्यानंतर आईला रडत रडत घडलेल्या घटनेची संपूर्ण माहिती सांगितली. नंतर, घरी परतल्यानंतर पीडितेने ही बाब वडिलांना सांगितली.
डॉक्टरने मुलीचा हात धरून मोबाईल क्रमांक मागितल्याचे व बाहेर कोणालाही काही सांगू नको, असे बजावल्याचे पीडितेने सांगितले. यापूर्वीही आरोपी डॉक्टरने इंस्टाग्रामवरून पीडितेला फ्रेंड रिक्वेस्ट पाठविल्याचे तिच्या जबाबात नमूद करण्यात आले आहे. पीडितेच्या वडिलांनी सायंकाळी घरी परतल्यानंतर संपूर्ण प्रकार ऐकून पोलिसांत तक्रार करण्याचा निर्णय घेतला.
साकोली पोलिसांनी या प्रकरणी तत्काळ गुन्हा दाखल करून डॉक्टर देवेश अग्रवाल (वय अंदाजे ४५ वर्ष) रा. साकोली यांच्याविरुद्ध भारतीय न्यायसंहिता २०२३ अंतर्गत कलम ६४(२)(१), ६५(१) तसेच पोक्सो कायदा आणि अ.जा.ज.अ.प्र.का.च्या विविध कलमान्वये गुन्हा दाखल केला आहे. आरोपी डॉक्टर अद्याप फरार असून, त्याचा शोध सुरू असल्याचे पोलिस सूत्रांकडून सांगण्यात आले आहे. साकोली शहरात या घटनेमुळे संतापाची लाट पसरली आहे.