अमरावती : विदर्भाची पंढरी म्हणून ओळख असलेल्या रुक्मिणी मातेचे माहेरघर, कौंडण्यपूर येथून माता रुक्मिणीची पालखी पंढरपूरकडे रवाना झाली.आषाढीवारीनिमित्त श्री विठ्ठल रुक्मिणी संस्थान येथून दरवर्षी पायदळ पालखी दिंडीचे आयोजन करण्यात येते. त्यानुसार ही दिंडी पालखी पंढरपुरसाठी मार्गस्थ झाली. ही दिंडी ३ जुलै रोजी श्री क्षेत्र पंढरपूर येथे पोहोचणार असून ३३ दिवसांचा प्रवास राहणार आहे. पालखी रवाना होताना श्री क्षेत्र कौंडण्यपूर येथे भव्य दिव्य कार्यक्रम पार पडला. त्यानंतर पालखीचे प्रस्थान झाले.
यावेळी पंचक्रोशीतील भाविकांसह राज्याच्या कानाकोपऱ्यातून आलेले श्रद्धाळू उपस्थित होते. कौंडण्यपूर येथे ४५० वर्षांपूर्वी संत सद्गुरू सदाराम महाराज होऊन गेले. त्यांनी १५९४ मध्ये कौंडण्यपूर ते पंढरपूर अशी वारी सुरू केली. ती परंपरा आजही सुरू असून पायदळ वारीचे यंदाचे ४३१ वे वर्ष आहे. रुक्मिणी मातेच्या माहेराहून निघणारी ही महाराष्ट्रातली पहिली पालखी आहे.वृद्धापकाळामुळे संत सद्गुरू सदाराम महाराजांना वारी करणे शक्य झाले नाही. त्यावेळी पांडुरंगाचा धावा केला असता पांडुरंगाने स्वतः संत सदाराम महाराजांना दर्शन देऊन मी दरवर्षी आषाढी, कार्तिक पौर्णिमा व प्रतिपदेला कौंडण्यपूरला येईन, असे वचन दिल्याची आख्यायिका आहे. ती परंपरा सुरू आहे.
यंदा पालखीचे प्रस्थान शेकडो वारकऱ्यांच्या उपस्थितीत झाले
आषाढी एकादशी जवळ येते तशी वारकऱ्यांची लगबग सुरू होते. पंढरपूरला जाण्यासाठी वारकरी निरनिराळ्या दिंडीत (पालखीत) सहभागी होतात. सर्व संतांच्या पालख्या पंढरपूरच्या दिशेने कूच करतात. संत ज्ञानेश्वर, संत तुकाराम, संत एकनाथ, मुक्ताई यांच्या पालख्या तर विदर्भातून संत गजानन महाराज व इतर पालख्या निघतात. वैशिष्ट्यपूर्ण आहे ती कौंडण्यपूर येथील मानाची रुक्मिणी मातेच्या माहेरची पालखी.ट
पालखीचा ३ जुलै रोजी पंढरपुरात होणार प्रवेश
पालखीत दररोज भजन, हरिपाठ, कीर्तन होईल. गेली कित्येक वर्षे सेवा करणारी ठिकठिकाणची गावकरी मंडळी उत्साहाने पालखीचे मार्गात स्वागत करतात. ३३ दिवसांच्या दीर्घ प्रवासानंतर दररोज अंदाजे १५ ते २० किमी प्रवास करून अमरावती, कारंजा, वाशीम, परभणी, बीड, उस्मानाबाद आणि सोलापूर जिल्ह्यातून प्रवास करून ३ जुलै रोजी पालखी पंढरपूर प्रवेश करणार आहे. तसेच ३० जून रोजी माढा मुक्कामी रिंगण सोहळा होणार आहे. ३ ते १० जुलैपर्यंत पालखीचा मुक्काम पंढरपूरला असून, १० जुलै रोजी परतीचा प्रवास सुरू होईल.