भंडारा : वर्षभरापूर्वी फेसबुकवर फ्रेंड्सशिप झाली आणि त्यातूनच अल्पवयीन मुला-मुलीचे एकमेकांवर प्रेम जडले, प्रेमात शारीरिक संबंधही प्रस्थापित झाले. मुलीला खासगी रुग्णालयात आणल्यावर ती चार महिन्यांची गर्भवती असल्याचे लक्षात आले. दोन्ही अल्पवयीन असल्याने साकोली पोलिसांनी बाललैंगिक अत्याचार प्रतिबंधक कलमात गुन्हा दाखल केला असून, न्यायालयीन आदेशाने बाल सुधारगृहात पाठविण्याची प्रक्रिया सुरू केली आहे.
साकोली तालुक्यातील दोन वेगवेगळ्या गावांतील १७ वर्षांचा मुलगा आणि १६ वर्षांची एक मुलगी वेगवेगळ्या महाविद्यालयात शिकतात. वर्षभरापूर्वी फेसबुकवर दोघांनीही एकमेकांना फ्रेंड रिक्वेस्ट पाठविली. त्यानंतर प्रोफाइल पिक्चर बघून दोघांत जिवापाड प्रेम पडले. एकमेकांना मेसेज, व्हॉट्सअॅप चॅटिंग सुरू झाले. हळूहळू भेटीगाठी वाढल्या आणि ते दोघे शरीरानेही जवळ आले. दोघेही शारीरिक संबंध ठेवू लागले, असे काही महिने चालत राहिले.
बुधवारी २६ जुलै रोजी मुलीला तिच्या कुटुंबीयांनी उपचारासाठी एका खासगी रुग्णालयात दाखल केले असता ती चार महिन्यांची गर्भवती असल्याचा खुलासा डॉक्टरांनी केला. बेशिस्त पीडितेच्या परिवाराने गुरूवारी पोलीस ठाण्यात तक्रार दाखल केली. या घटनेच्या पार्श्वभूमीवर साकोली पोलिसांनी सोशल मीडियाच्या माध्यमातून विद्यार्थ्यांना सतर्क राहण्याचे आवाहन केले आहे. शाळेत आपल्या पाल्यांना स्मार्टफोन न देण्याचे आवाहनही पोलीस निरीक्षक राजेशकुमार थोरात यांनी केले आहे.