नागपूर : राज्यभरात महिलांची छेडखानी आणि लैंगिक अत्याचाराचे गुन्हे वाढत असतानाच राज्यातील प्रत्येक जिल्हा आणि आयुक्तालयात स्थापन करण्यात आलेले निर्भया पथक मात्र अद्यापही कागदावरच दिसत आहे.

आर्काइव्हमधील सर्व बातम्या मोफत वाचण्यासाठी कृपया रजिस्टर करा

दिल्लीतील निर्भया प्रकरणानंतर राज्यात निर्भया पथक स्थापन करण्याचा निर्णय घेण्यात आला होता. त्यासाठी राखीव पोलीस अधिकारी, महिला कर्मचारी, स्वतंत्र वाहनांची व्यवस्था करण्यात आली होती. तसेच या पथकावर थेट पोलीस महासंचालकांच्या नियंत्रणाची व्यवस्था असायची. जानेवारी २०२२ मध्ये निर्भया पथकाची राज्यभर स्थापना करण्यात आली. हे पथक महिलांच्या सुरक्षिततेसाठी २४ बाय ७ कार्यरत असणे अपेक्षित आहे. मात्र, मुंबई पोलीस आयुक्तालय वगळता गृहमंत्रालयाच्या आदेशाला अन्य पोलीस आयुक्त आणि पोलीस अधीक्षकांनी गांभीर्याने घेतलेले दिसत नाही. गृहमंत्रालयातून आदेश आल्यामुळे अनेक पोलीस आयुक्तांनी पथकाची स्थापना केली खरी, पण त्यातील सर्व नियुक्त्या कागदोपत्रीच असल्यामुळे या पथकाच्या कार्यप्रणालीवरच संशय निर्माण झाला आहे.

हेही वाचा…‘एफडीए’च्या नावावर बनावट पथकाकडून छापेमारी, व्यवसायिकांची लूट

दामिनी पथकच बनले निर्भया पथक

याआधी राज्यातील प्रत्येक जिल्ह्यात आणि आयुक्तालयात दामिनी पथकाची स्थापना करण्यात आली. काही पोलीस आयुक्त आणि अधीक्षकांनी दामिनी पथकालाच कागदोपत्री निर्भया पथकाचे नाव देऊन वेळकाढूपणा केल्याचे समोर आले आहे.

निर्भया पथकाच्या वाहनांचा पोलीस गस्तीसाठी वापर

निर्भया पथकाला मिळालेल्या वाहनांचा पोलिसांच्या नियमित गस्तीसाठी वापर करण्यात येत आहे. मुंबईसारख्या पोलीस दलात तर चक्क राजकीय नेत्यांच्या सुरक्षेसाठी निर्भया पथकाच्या वाहनांचा वापर झाला आहे.

हेही वाचा…नागपुरात डॉक्टरांनाही डेंग्यू, चिकनगुनियाचा विळखा

नागपूर शहर पोलीस दलात आधीच दामिनी पथक असल्यामुळे निर्भया पथकाची स्थापना करण्यात आली नाही. दोन्ही पथकांचे कार्य सारखे आहे. – राहुल माकणीकर, पोलीस उपायुक्त.

Nagpur News (नागपूर / विदर्भ न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Nirbhaya squads in maharashtra remain largely inactive with operations limited to paperwork adk 83 psg