अकोला : शासकीय वैद्यकीय महाविद्यालय व सर्वोपचार रुग्णालयातील रिक्त पदांमुळे रुग्णसेवा प्रभावित झाली आहे. यंत्रणेवर अतिरिक्त ताण येत असल्याचे समोर आले. या पार्श्वभूमीवर कंत्राटी कर्मचारी भरण्यासाठी नवीन शासन निर्णयानुसार तात्काळ प्रस्ताव सादर करण्याचे आदेश जिल्हाधिकारी अजित कुंभार यांनी दिले.
नांदेड येथील घटनेनंतर जिल्ह्यातील आरोग्य यंत्रणेची पडताळणी केली जात आहे. रुग्णालयांमध्ये मोठ्या प्रमाणावर पदे रिक्त आहेत. रुग्णालयात उपचारासाठी दाखल होणाऱ्या रुग्णांची संख्या लक्षात घेता कार्यरत यंत्रणेवर अतिरिक्त ताण येतो. रुग्णांना योग्य उपचार व सुविधा उपलब्ध होऊ शकत नाही. दरम्यान, जिल्हाधिकारी अजित कुंभार यांनी रुग्णालयाची पाहणी करून आरोग्य यंत्रणेचा आढावा घेतला. यावेळी अधिष्ठाता डॉ. मीनाक्षी गजभिये, वैद्यकीय अधीक्षक डॉ. प्रवीण सपकाळ यांच्यासह विविध विभागप्रमुख, प्रशासकीय अधिकारी, औषधनिर्माता आदी उपस्थित होते.
हेही वाचा >>> अकोला : माजी कृषिमंत्री शरद पवारांच्या उपस्थितीत गुरुवारी सहकार महामेळावा
रुग्णालयात अतिआवश्यक औषध साठ्याच्या नियमित उपलब्धतेसाठी आवश्यकतेनुसार खरेदीच्या दृष्टीने तत्काळ कार्यवाही करण्याच्या सूचना जिल्हाधिकाऱ्यांनी दिल्या. रुग्णालयात पुरेसा औषधसाठा व यंत्रणा सुसज्ज ठेवावी. पुरेशा मनुष्यबळासाठी कंत्राटी कर्मचारी भरतीचा प्रस्ताव त्वरित सादर करावा. रुग्णसेवेत कुठेही उणीव राहता कामा नये, याची दक्षता घ्यावी. रुग्णालयात नियमित स्वच्छता ठेवावी, असे देखील जिल्हाधिकाऱ्यांनी सांगितले.
हेही वाचा >>> तुम्‍हालाही मुलं-बाळं आहेत, हे लक्षात ठेवा.., आमदार नितीन देशमुख यांचा अधिकाऱ्यांना इशारा
आरोग्य यंत्रणेने करोनाकाळात अविरत सेवा बजावली. यापुढेही सर्वांनी अशीच सकारात्मकता व संवेदनशीलता बाळगून कार्य करावे. सर्वांनी एक चमू म्हणून समन्वयाने काम करावे, असे आवाहनही जिल्हाधिकाऱ्यांनी केले. बालरोगशास्त्र विभागाला कक्ष क्र. ३२ ही जागा मिळण्याबाबत, तसेच औषधवैद्यकशास्त्र विभाग इतर कक्षात स्थलांतराबाबतही यावेळी चर्चा झाली. त्याचप्रमाणे, जिल्हा शल्यचिकित्सक डॉ. तरंगतुषार वारे यांच्याशी चर्चा करून जिल्हाधिकाऱ्यांनी आरोग्य यंत्रणेबाबत विविध विषयांची माहिती घेतली.