नाशिक – दिवाळी म्हणजे खरेदी. प्रकाशाच्या उत्सवात घर उजळावे यासाठी प्रत्येकाचे प्रयत्न सुरू असतात. यासाठी आपआपल्या आर्थिक क्षमतांचा अंदाज घेत खरेदीचा मुहूर्त साधतांना यंदा नवीन काय याची चाचपणी सुरू आहे. यंदा बाजारपेठेत लक्ष्मीपूजनासाठी नवीन पूजेचे सामान आले आहे याशिवाय आकाश कंदिलासाठी नवे काही पर्याय आहेत. विद्युत माळांमध्ये चीनी बनावटीचा दबदबा कायम आहे.

दिपोत्सव म्हणजे प्रकाशाचा लखलखाट. अंगणातील मिणमिणत्या पणतीबरोबर झाडावर किंवा गच्चीवर टांगलेला आकाशकंदील दिवाळीचा अविभाज्य भाग. यंदाही बाजारपेठेत बांबुपासून बनवलेले, कापडापासून तसेच प्लास्टिकचा वापर करत तयार करण्यात आलेल्या पारंपरिक आकाशकंदिलाला पर्याय म्हणून काही नवीन प्रकार बाजारात आले आहेत. यामध्ये पितळ तसेच तांबेसदृश धातूंमधील आकाशकंदील वेगवेगळ्या आकारात आहेत. हे आकाशकंदील एरवी दिवाणखाण्यात सजावटीसाठी वापरता येऊ शकतात.

साध्या दिव्यांऐवजी आता रंग बदलणारे आणि रिमोट कंट्रोलने नियंत्रित होणारे एलईडी दिवे बाजारात मोठ्या प्रमाणात येत आहेत. यामुळे ग्राहकांना एकाच दिव्यात अनेक रंग आणि प्रकार बदलण्याचा पर्याय मिळतो. याशिवाय ऊर्जा-बचतीसाठी सौर उर्जेवर आधारीत काही आकाशकंदील आहेत. पणत्यांसाठी सुरक्षिततेच्या दृष्टीने, मेणाच्या दिव्यांऐवजी बॅटरीवर चालणाऱ्या फ्लेमलेस एलईडी टी-लाईट्साठी विचारणा होत आहे. लक्ष्मीपूजनासाठी लक्ष्मी, सरस्वती, गणपती यांचे छायाचित्र असलेल्या चोपड्या उपलब्ध आहेत.

हेही वाचा

याव्यतिरिक्त देवीच्या मूर्ती, लक्ष्मी पोटली, कुबेर पोटली यामध्ये लक्ष्मी यंत्र, गोमती चक्र, कवडी आदी सामान मिळत आहे. साधारणत: ५० रुपयांपासून ४०० रुपयांपर्यंत त्यांची विक्री होत आहे. दिवाळीत एकमेकांना भेटवस्तु देतांना आरोग्याला प्राधान्य देत हर्बल टी, ऑर्गेनिक स्किनकेअर, अरोमाथेरपी कँडल्स आणि एसेंशियल ऑइल्स यांचा समावेश असलेले ‘वेलनेस हम्पर’ भेट म्हणून देण्याकडे कल आहे.

दरम्यान, सजावटीसाठी लागणाऱ्या सामानात लक्ष्मीची पाऊले, तयार रांगोळीसाठी लाकडी तसेच अक्रेलिक रांगोळ्या आल्या आहेत. यामध्ये अगदी लहान आकारापासून मोठ्या आकारापर्यंत, देवघरासमोर तसेच अंगणात काढता येतील असे तयार रांगोळीचे लाकडी साचे आहेत. यामध्ये काही ठिकाणी रांगोळीचे रंग वापरत तयार रांगोळ्या विकण्यासाठी ठेवण्यात आल्या आहेत.

विद्युत माळांमध्ये पणत्या, दीपमाळ यासह वेगवेगळे पर्याय असतांना यामध्ये चिनी बनावटीचा प्रभाव वाढला आहे. कमी दरात या वस्तु मिळत असल्याने मागणी वाढली आहे.

दिवाळीतील विद्युत साहित्यांमध्ये चीनी बनावटीचा दबदबा कायम

स्वदेशीचा नारा देण्यात येत असला तरी दिवाळीतील विद्युत साहित्यांमध्ये चीनी बनावटीचा दबदबा कायम आहे. भारतीय बनावटीच्या साहित्यांपेक्षा त्यांची किंमत कमी असल्याने त्यांना मागणीही आहे. दिवाळीत यंदा अनेक गोष्टी प्रथमच आल्या आहेत. त्यात लक्ष्मीपूजनासाठी असलेल्या पूजेच्या सामानातही नवलाई आहे. वैविध्यपूर्ण आकाशकंदिलांचा समावेश आहे.