जळगाव – जिल्हाधिकारी रोहन घुगे यांनी पदभार घेतल्यानंतर वाळू माफियांनी त्यांना अनोखी सलामी दिली आहे. चोपडा तालुक्यात अवैध वाळू वाहतूक करणाऱ्यांवर कारवाईसाठी गेलेल्या महसूल अधिकाऱ्याला थेट ट्रॅक्टरखाली ओढून जीवघेणा हल्ला केल्याची  घटना रविवारी घडली. या प्रकरणी ट्रॅक्टर मालक आणि चालक यांच्या विरोधात गुन्हा दाखल करण्यात आला आहे.

बुधगाव ते जळोद दरम्यानच्या तापीवरील पुलाखाली वाळूची चोरी सुरू असल्याची गोपनीय माहिती अमळनेरच्या प्रांत अधिकाऱ्यांना मिळाली होती. त्यानुसार त्यांनी तातडीने कारवाईच्या सूचना महसूल विभागाच्या पथकाला दिल्या. त्यांच्या निर्देशानुसार चोपडा तालुक्यातील हातेड भागाचे मंडळ अधिकारी रवींद्र माळी यांच्या नेतृत्वाखाली ग्राम महसूल अधिकारी अनंत माळी, संतोष कोळी, वर्डीचे ग्राम महसूल अधिकारी सुधाकर महाजन, अकुलखेडा येथील तिलेश पवार आणि बुधगावचे भूषण पवार यांचे पथक रविवारी पहाटे चारच्या सुमारास कारवाईसाठी रवाना झाले. या दरम्यान, सकाळी सहा वाजण्याच्या सुमारास बुधगावच्या हद्दीत जळोद रस्त्यावरील पुलाखाली तापी नदी पात्रात महसूल विभागाच्या पथकाला एक ट्रॅक्टर वाळू भरून येताना दिसले.

पथकाने ट्रॅक्टरजवळ पोहोचून चालकाची चौकशी केली असता, त्याने ते अजय कोळी यांच्या मालकीचे असल्याचे सांगितले. त्यानंतर मात्र तो महसूल विभागाच्या पथकाला गुंगारा देऊन पळून गेला. त्यामुळे पथकाने ट्रॅक्टर जप्त करून चोपडा तहसील कार्यालयात नेण्याचा प्रयत्न केला. ग्राम महसूल अधिकारी अनंत माळी स्वतः ट्रॅक्टरवर बसले होते. यावेळी ट्रॅक्टर चालक विजय पावरा आणि ट्रॅक्टर मालक अजय कोळी (दोघे रा. बुधगाव) हे दोघे तिथे पोहोचले. त्यांनी रस्त्यात अडथळा निर्माण केला आणि ट्रॅक्टर पुढे जाऊ देणार नाही, असे सांगत वाद घातला. वादाचे रूपांतर नंतर हाणामारीत झाले. चालक पावरा याने ट्रॅक्टरवर बसलेल्या माळी यांची कॉलर पकडून खाली ओढले. आणि जीवे मारण्याच्या उद्देशाने थेट ट्रॅक्टरच्या मागील चाकासमोर फेकून दिले.

घडलेला प्रकार पाहून बरोबर असलेले मंडळ अधिकारी रवींद्र माळी यांनी प्रसंगावधान राखले. अनंत माळी यांना तातडीने ट्रॅक्टरच्या बाजूला ओढले. त्यामुळे माळी यांचा जीव वाचला. मात्र, या घटनेत ते गंभीर जखमी झाले. चालक पावरा आणि मालक कोळी यांनी वाळू खाली टाकून ट्रॅक्टर घेऊन घटनास्थळावरून पळ काढला. जखमी ग्राम महसूल अधिकारी माळी यांना आता उपचारासाठी चोपडा उपजिल्हा रुग्णालयात दाखल करण्यात आले आहे. मंडळ अधिकारी माळी यांच्या तक्रारीवरून ट्रॅक्टरचा चालक विजय पावरा आणि मालक अजय कोळी यांच्या विरोधात जीवे ठार मारण्याचा प्रयत्न करणे, शासकीय कामात अडथळा आणणे आणि इतर कलमांखाली चोपडा ग्रामीण पोलीस ठाण्यात गुन्हा दाखल करण्यात आला आहे.