विरोधामुळे नऊ महिने काम लांबणीवर
भारत-पाकिस्तान युद्धात वापरलेला रणगाडा मुंबई-आग्रा महामार्गावरील लेखानगर चौकात ठेवण्याच्या कामात समाजकंटकांकडून अडथळे आणले जात असल्याच्या पाश्र्वभूमीवर, हे काम पोलीस बंदोबस्तात करण्याची तयारी महापालिकेने सुरू केली आहे. नऊ महिन्यांपासून रखडलेले हे काम आता पोलीस सुरक्षा व्यवस्थेत मार्गी लागणार आहे.
तोफखाना स्कूल, वैमानिक प्रशिक्षण केंद्र, हवाई दलाचे देखभाल दुरुस्ती केंद्र आणि सुखोई विमानांची बांधणी अशा लष्करी कार्यालयांचे सान्निध्य लाभलेल्या शहरात शौर्याचे प्रतीक उभारण्याची संकल्पना सिडकोतील प्रभाग क्रमांक २४ चे नगरसेवक प्रवीण तिदमे यांनी मांडली होती. त्यास महापालिका, सिडको प्रशासन आणि संरक्षण विभागाची मान्यता मिळाली.
रणगाडा ठेवण्याविषयी कार्यादेश झाले. यासाठी महापालिका निधी खर्च करणार नाही. सामाजिक दायित्व निधीतून बांधकाम व्यावसायिक रुंग्टा बिल्डर यांच्यामार्फत हे काम केले जाणार आहे. त्यानुसार निश्चित जागेत हे काम नऊ महिने लोटूनही सुरू झाले नाही. मार्च २०१९ मध्ये ते मंजूर झाले होते. लष्कराच्या पुणे केंद्रातून तो रणगाडा विशिष्ट कालावधीत आणण्याची मुदत होती. ज्या जागेवर रणगाडा ठेवला जाणार आहे, तिथे चबुतरा उभारून देण्याची पालिकेची जबाबदारी आहे. हे काम रखडण्यामागे स्थानिक वादग्रस्त राजकीय पुढारी, त्याच्या कार्यकर्त्यांचा अडथळा असल्याचा आरोप तिदमे यांनी केला होता.
महापालिकेच्या उपरोक्त जागेत संबंधितांची वाहने मोठय़ा संख्येने उभी राहतात. ही संकल्पना प्रत्यक्षात आल्यावर वाहनांना जागा मिळणार नाही, या कारणास्तव उपरोक्त कामास विरोध होत असल्याचे सांगितले जाते. परिसरात बीअर बार देखील आहे. यामुळे मजूर कामासाठी उपरोक्त ठिकाणी गेले की, समाजकंटक धमकावत संबंधितांना पिटाळून लावतात. सर्व पूर्तता होऊनही महापालिकेने दुर्लक्ष केल्याने एका चांगल्या संकल्पनेला शहरवासीयांना मुकावे लागत असल्याचा मुद्दा तिदमे यांनी मांडला होता. या प्रश्नी आंदोलनाचा इशारा दिल्यानंतर प्रशासनाने दखल घेत काम सुरू करण्याचे संकेत दिले. पालिकेकडून बंदोबस्ताची मागणी
रणगाडा ठेवण्यास काहींनी हरकत नोंदविली आहे. त्यामुळे सध्या काम बंद स्थितीत आहे. पालिका आयुक्तांनी हे काम पोलीस सुरक्षा व्यवस्थेत करण्याचे निर्देश दिले आहेत. त्या अनुषंगाने पोलिसांनी सुरक्षा व्यवस्था पुरवावी. लेखानगर चौकातील पालिकेच्या त्रिकोणी जागेत युद्धात वापरलेला रणगाडा ठेवला जाणार आहे. वाहतूक पोलीस शाखेने त्यास नाहरकत दाखला दिल्याची माहिती महापालिकेने पोलीस यंत्रणेला दिली असल्याची माहिती महापालिकेच्या वाहतूक कक्षाचे कार्यकारी अभियंत्यांनी दिली.