पनवेल आगारात एसटीत चढताना सोनसाखळी चोरी

पनवेल : पनवेल बस आगारातून पेणकडे जाणाऱ्या बसमध्ये चढताना प्रवाशाची ७० हजार रुपयांची सोनसाखळी चोरट्याने हिसकावली. या चोरीची माहिती प्रवाशाला उशीराने समजली. याबाबत पनवेल शहर पोलीस ठाण्यात तक्रार नोंद केली आहे. २५ एप्रीलला पनवेल ते पेण या पल्यावर ३६ वर्षीय विशाल पाटील हे एसटीने प्रवास करण्यासाठी पनवेल बस आगारात गेले होते. रात्री सव्वा सात वाजता विशाल आगारातील फलाट क्रमांक १ येथील पेण बसमध्ये चढताना विशाल यांची १२ ग्रॅम वजनाची सोनसाखळी चोरट्याने हिसकावली.

महिना भरात सर्वत्र शोध घेतल्यानंतर विशाल यांनी पोलीसांत तक्रार दिली. पनवेल शहरात चोऱ्यांचे प्रमाण वाढले आहे. महिन्या भरापूर्वी शहरातील मिडलक्सास सोसायटीमध्ये एका घरात दोन महिलांनी घरात शिरुन चोरी केली होती. सकाळी सव्वा नऊ वाजण्याच्या सूमारास घरात सारे असताना या चोरट्या महिलांनी स्वतःकडे लहान बाळ घेऊन घरात प्रवेश केला. घरातील सर्व सदस्य कामात गुंतले असताना ही चोरी सकाळच्या सूमारास झाली होती. या घरातून ७७ हजार रुपयांचे मोबाईल या महिलांनी चोरले होते.

आणखी वाचा-सट्टा बाजारात भरघोस परताव्याचे आमिष दाखवून तब्बल १ कोटी ७ लाखांची फसवणूक 

या घटनेनंतर पनवेल शहर पोलीसांनी नागरिकांना सतर्क राहण्याचे आवाहन केले आहे. निवडणूकीच्या बंदोबस्तामुळे ताणाखाली असणाऱ्या पोलीसांना शालेय सुट्यांमुळे अनेक नागरिक घरांना कुलूप लावून पर्यटनासाठी बाहेर जात असल्याने पोलीसांची गस्त वाढवावी अशी मागणी नागरिकांकडून होत आहे.