‘देवेंद्रजी मुख्यमंत्री व्हायला हवे होते का?’ या प्रश्नावर अमृता फडणवीसांचे उत्तर, म्हणाल्या “एकनाथ शिंदेंचे नाव समोर आल्यावर…”

झी मराठीच्या ‘बस बाई बस’ या कार्यक्रमाची सध्या जोरदार चर्चा सुरु आहे. अभिनेता सुबोध भावे सध्या या कार्यक्रमाचे सूत्रसंचालन करत आहे. या कार्यक्रमाच्या पहिल्या भागात राष्ट्रवादीच्या खासदार सुप्रिया सुळे, दुसऱ्या भागात अभिनेत्री अमृता खानविलकर सहभागी झाल्या होत्या. त्यानंतर आता तिसऱ्या भागात उपमुख्यमंत्री देवेंद्र फडणवीस यांच्या पत्नी अमृता फडणवीस हजेरी लावली. नुकतंच झी मराठीवर हा भाग प्रसारित झाला. यावेळी विविध गंमतीजमती पाहायला मिळाल्या. गेल्या काही दिवसांपासून राज्याच्या राजकारणात विविध उलथापालथ पाहायला मिळाली. राज्यातील महाविकासआघाडीचे सरकार कोसळल्यानंतर मुख्यमंत्रीपदी एकनाथ शिंदे आणि उपमुख्यमंत्रीपदी देवेंद्र फडणवीस यांनी शपथ घेतली. बस बाई बस या कार्यक्रमात विविध राजकीय घटनांवर अमृता फडणवीसांना प्रश्न विचारण्यात आले. देवेंद्र फडणवीस हेच मुख्यमंत्री व्हायला हवेत असे वाटतं का? असा प्रश्न अमृता फडणवीसांना विचारण्यात आला. त्यावर त्यांनी अगदी मुद्देसूदपणे उत्तर दिलं "देवेंद्रजी हेच मुख्यमंत्री असावेत असे मला कधीच वाटले नाही", असे अमृता फडणवीस म्हणाल्या. "जेव्हा एकनाथ शिंदेंचे नाव पुढे आले तेव्हापासून मला कधीच वाटले नाही की देवेंद्रजी हेच मुख्यमंत्री असावेत." "पण कदाचित वाटू शकलं असतं जर इतर कोणाचं नाव पुढे आलं असतं. तर असे मला नक्कीच वाटलं असते", असेही त्यांनी सांगितले. त्यासोबत त्यांनी वर्षा बंगल्याची फारच आठवण येते, असेही म्हटले. सर्व फोटो - अमृता खानविलकर/इन्स्टाग्राम