नागराज मंजुळेच्या जवळचा माणूस ते आरोपी; ‘प्रिन्स’ची भूमिका साकारणारा सूरज पवार आहे तरी कोण?

प्रसिद्ध दिग्दर्शक नागराज मंजुळे यांचा सैराट हा चित्रपट घराघरात लोकप्रिय आहे. हा चित्रपट प्रदर्शित होऊन ६ वर्ष उलटली आहे. मात्र अजून या चित्रपटाची क्रेझ कायम आहे. या चित्रपटात अभिनेत्री रिंकू राजगुरू आणि अभिनेता आकाश ठोसर यांच्यासोबतच प्रिन्सची भूमिकाही गाजली. मात्र आता अभिनेता सूरज पवार हा अडचणीत सापडला आहे. मंत्रालयात नोकरीचं आमिष देऊन शिर्डीतील एका व्यक्तीला फसवल्याचा आरोप सूरजवर करण्यात आला आहे. त्यामुळे त्याला अटक होण्याची शक्यता वर्तवली जात आहे. अहमदनगर जिल्ह्यातील शिर्डीत हा फसवणुकीचा धक्कादायक प्रकार समोर आला आहे. सूरज हा सोलापूर जिल्ह्यातील करमाळा तालुक्यातील पोफळज गावचा आहे. या चित्रपटामुळे तो देशभरात प्रसिद्ध झाला. काही दिवसांपूर्वी महानायक अमिताभ बच्चन यांच्यासोबतही त्याने ‘झुंड’मध्ये स्क्रीन शेअर केली आहे. ‘झुंड’मध्ये त्याने पाहुण्या कलाकाराची भूमिका साकारली आहे. नागराज मंजुळे यांच्या 'पिस्तुल्या' या लघुचित्रपटातून सूरज यांच्या चित्रपट करिअरला सुरुवात झाली. ‘पिस्तुल्या’मध्ये पारधी समाजातील मुलगा, ‘फँड्री’तील जब्याच्या मित्राची भूमिका सूरजने साकारली होती. सूरजने वयाच्या केवळ १५ व्या वर्षी खलनायकाची भूमिका साकारली होती. सूरजने शिक्षकांच्या भीतीने शाळा अर्धवट सोडली होती. पण आईच्या निधनानंतर त्याने पुन्हा शिक्षण सुरु केलं आहे. तो सध्या नागराज मंजुळेंसोबत पुण्याला राहत आहेत. ‘पिस्तुल्या’मध्ये पारधी समाजातील मुलगा, ‘फँड्री’तील जब्याचा मित्र आणि ‘सैराट’मधील आर्चीचा भावाच्या भूमिकेनंतर सुरज खूपच प्रसिद्ध झाला. सूरजने नागराज मंजुळे यांच्या सर्व चित्रपटात काम केलं आहे. त्यामुळे तो लाडका असल्याचे बोललं जात आहे. सूरजला आई-वडील नसल्याने तो ९-१० वर्षांपासून नागराज यांच्या कुटुंबासोबत पुण्यात राहत आहे. नागराज मंजुळे यांच्या जवळपास प्रत्येक चित्रपटात तो झळकला आहे. माझ्यासाठी अण्णा म्हणजे नागराज मंजुळे सर्वकाही आहेत, असे त्याने अनेकदा मुलाखतीत म्हटले आहे. सूरजचा ‘घर, बंदूक, बिर्याणी’ हा चित्रपट लवकरच प्रदर्शित होत आहे. पण अहमदनगर त्या घटनेमुळे तो अडचणीत आला आहे. तो या प्रकरणी सहभागी आहे की नाही हे चौकशीनंतर समोर येईल. मात्र आता त्याच्यावर अटकेची टांगती तलवार आहे हे दिसत आहे.