राज ठाकरेंचा दमदार आवाज असलेल्या ‘हर हर महादेव’मध्ये झळकणार ‘हे’ कलाकार, नावं समोर

झी स्टुडियोजची निर्मिती असलेल्या आणि अभिजित देशपांडे यांच्या दिग्दर्शनाने सजलेल्या बहुप्रतीक्षित ‘हर हर महादेव’ या चित्रपटाची सध्या सर्वत्र चर्चा पाहायला मिळत आहे. महाराष्ट्राचे आद्य दैवत छत्रपती शिवाजी महाराज आणि भारतीय इतिहासातील अनन्य साधारण व्यक्तिमत्व असलेल्या बाजीप्रभूंवर हा चित्रपट चित्रित करण्यात आला आहे. ‘हर हर महादेव’ या चित्रपटातील कलाकारांची पहिली झलक काही दिवसांपूर्वी समोर आली होती. दमदार कलाकार आणि जबरदस्त गाणी असलेल्या या चित्रपटाच्या ट्रेलरची सुरुवात मनसे अध्यक्ष राज ठाकरे यांच्या आवाजाने होते. झी स्टुडीओची निर्मिती असलेल्या या चित्रपटात तगडी स्टारकास्ट आपल्याला दिसणार आहे. या चित्रपटात छत्रपती शिवाजी महाराजांची भूमिका अभिनेता सुबोध भावे साकारणार आहे. तर या चित्रपटात अभिनेत्री अमृता खानविलकरही एका ऐतिहासिक भूमिकेत दिसणार आहे. गनिमांना कंठस्नान घालणाऱ्या बाजीप्रभू देशपांडे यांच्या पत्नी सोनाबाई देशपांडे यांची भूमिका ती साकारत आहेत. अमृता खानविलकरबरोबर या चित्रपटात अभिनेत्री सायली संजीव पहिल्यांदाच ऐतिहासिक भूमिका साकरताना दिसत आहे. मनातील दु:ख चेहऱ्यावर न दाखवता नेहमी स्मित हास्याने छत्रपती शिवाजी महाराजांच्या पाठिशी खंबीरपणे उभ्या राहणाऱ्या त्यांच्या अर्धांगिनी ‘महाराणी सईबाई भोसले’ या भूमिकेत सायली संजीव दिसणार आहे. तर या चित्रपटात बाजीप्रभू देशपांडे यांच्या भूमिकेत अभिनेते शरद केळकर झळकणार आहे. स्वराज्याच्या लढाईत छत्रपती शिवाजी महाराजांना अखेरपर्यंत साथ देणारे चतुर, धाडसी, निष्ठावान साथीदार म्हणून आबाजी विश्वनाथ यांना ओळखले जाते. या चित्रपटात आबाजी विश्वनाथ ही भूमिका अभिनेता हार्दिक जोशी साकारताना दिसणार आहे. येत्या २५ ऑक्टोबरला दिवाळीच्या मुहूर्तावर हा चित्रपट चित्रपटगृहात प्रदर्शित होत आहे. अभिजीत देशपांडे यांनी या चित्रपटाचे लेखन आणि दिग्दर्शन केले आहे. तर ‘हर हर महादेव’ या चित्रपटाची निर्मिती सुनील फडतरे यांच्या श्री गणेश मार्केटिंग अँड फ्रेंड्स’ यांनी केली आहे. हा चित्रपट मराठीसह हिंदी, तमिळ, तेलुगू आणि कन्नड भाषेतून प्रदर्शित होणार आहे. आणखी वाचा : “आर्थिक मंदीदरम्यान…” ‘इंडियन आयडल’ जिंकल्यानंतर मिळालेल्या पैशांबद्दल अभिजीत सावंतने केला खुलासा