Photos : “कायमस्वरुपी बुकींग झालंय…” सिद्धार्थ मल्होत्रा-कियारा अडवाणीच्या लग्नाचे फोटो अखेर समोर, पाहा शाही थाट

बॉलिवूड अभिनेता सिद्धार्थ मल्होत्रा आणि अभिनेत्री कियारा अडवाणी आज ७ फेब्रुवारी लग्नबंधनात अडकले. राजस्थानच्या जैसलमेर या ठिकाणी असलेल्या सूर्यगढ पॅलेसमध्ये त्या दोघांनी सप्तपदी घेत लग्नगाठ बांधली. आता त्यांच्या लग्नाचे फोटो समोर आले आहेत. ते दोघेही नववधू-वराच्या वेषात फारच सुंदर दिसत आहेत. सिद्धार्थ-कियारा या दोघांनीही त्यांच्या सोशल मीडियावर फोटो शेअर केले आहेत. “आता आमची कायमस्वरुपी बुकींग झाली आहे. आमच्या पुढील वाटचालीसाठी तुमचे आशीर्वाद आणि प्रेम राहू द्या”, असे कॅप्शन त्यांनी हे फोटो शेअर करताना दिले आहेत. यावेळी सिद्धार्थने गोल्डन रंगाची शेरवानी, फेटा असा लूक केल्याचे दिसत आहे. तर कियाराने गुलाबी रंगाचा लेहंगा परिधान केला आहे. याबरोबर तिने हिरव्या रंगाचा नेकलेस, बिंदी असा लूक केला होता. त्यांनी शेअर केलेल्या पहिल्या फोटोत ते दोघेही एकमेकांसमोर हात जोडून हसताना दिसत आहे. तर दुसऱ्या फोटोत ते दोघेही एकमेकांकडे पाहून स्मितहास्य करत आहेत. त्यानंतर त्या दोघांनीही एकमेकांच्या गालावर किस करतानाचा फोटो शेअर केला आहे. दरम्यान सिद्धार्थ आणि कियाराने यांच्या लग्नाचे विधी राजस्थानच्या सूर्यगढ पॅलेसमध्ये पार पडले. (सर्व फोटो - सिद्धार्थ मल्होत्रा/कियारा अडवाणी- इन्स्टाग्राम)