पहिला प्रपोज ते सेलिब्रिटी क्रश, नागराज मंजुळेंनी केला खुलासा; म्हणाले “आता सांगण्यात…”

प्रसिद्ध मराठी दिग्दर्शक नागराज मंजुळे हे कायमच काही ना काही कारणांमुळे चर्चेत असतात. नागराज मंजुळे दिग्दर्शित ‘घर बंदूक बिरयानी’ हा चित्रपट आज प्रदर्शित होत आहे. या चित्रपटाच्या माध्यमातून ते पुन्हा प्रेक्षकांच्या भेटीला येत आहेत. नागराज मंजुळे यांनी ‘फँड्री’, ‘सैराट’, ‘नाळ’, ‘झुंड’ यांसारखे सुपरहिट चित्रपट दिले आहे. नागराज मंजुळे यांनी ‘घर बंदूक बिरयानी’ या चित्रपटाच्या निमित्ताने अनेक मुलाखती दिल्या. या मुलाखतीत त्यांनी त्यांच्या खासगी आयुष्यातील अनेक गोष्टींचा खुलासा केला. नुकतंच 'लोकमत' या वृत्तपत्राला दिलेल्या मुलाखतीत त्यांनी त्यांच्या आयुष्यातील पहिला प्रपोजसह, क्रशबद्दल भाष्य केले. तुम्ही पहिल्यांदा कोणाला प्रपोज केलं होतं? असा प्रश्न नागराज मंजुळेंना विचारण्यात आला होता. त्यावर त्यांनी मजेशीर उत्तर दिले. "ही खूप जुनी गोष्ट आहे. आता ते सांगून काहीही अर्थ नाही", असे ते म्हणाले. "मला त्या गोष्टी आठवतात, पण आता त्या सांगण्यात काहीही अर्थ नाही", असे नागराज मंजुळेंनी म्हटले. यानंतर त्यांना तुमचा पहिला सेलिब्रिटी क्रश कोण? असा प्रश्न विचारण्यात आला. त्यावर ते म्हणाले, "मी लहान असल्यापासून मला श्रीदेवी फार आवडायच्या." "मी त्यांचे अनेक फोटोही जमा करुन ठेवायचो." "आता कोणीही क्रश नाही. आता सर्व क्रॅश झाल्यात", असे नागराज मंजुळेंनी म्हटले. दरम्यान 'घर, बंदूक, बिरयानी' या चित्रपटात सयाजी शिंदे, नागराज मंजुळे आणि आकाश ठोसर यांच्या प्रमुख भूमिका आहेत.