चाळीतलं घरं, एकेदिवशी उंदरांनी जेवणाची नासाडी केली अन्…; ‘चला हवा येऊ द्या’ फेम अभिनेत्रीने सांगितला ‘तो’ अनुभव

टीव्हीवरील विनोदी शो 'चला हवा येऊ द्या'मधील कलाकार सर्वांच्याच परिचयाचे झाले आहेत. गेली अनेक वर्षे हा शो प्रेक्षकांना खळखळून हसवत आहे. या शोमध्ये आपल्या विनोदाने प्रेक्षकांच्या चेहऱ्यावर हसू आणणाऱ्या कलाकारांचा वैयक्तिक आयुष्यात मात्र वेगळाच संघर्ष आहे. यापैकी एक म्हणजे अभिनेत्री स्नेहल शिदम होय. . स्नेहलने तिच्या आयुष्यातील एक किस्सा सांगितला होता, ज्यात उंदराने घातील जेवणाची नासाडी केल्यानंतर तिच्या वडिलांनी एक निर्णय घेतल्याचं ती म्हणाली होती. ‘इट्स मज्जा डॉटकॉम’ला दिलेल्या मुलाखतीत स्नेहलने तिच्या घराची गोष्ट सांगितली होती. स्नेहल विलेपार्ले येथील चाळीत राहते. या चाळीमध्येच तिचं छोटसं घर आहे. काही वर्ष भाड्याच्या घरात राहिल्यानंतर स्नेहलच्या आई-वडिलांनी विलेपार्लेच्या चाळीमध्येच घर खरेदी केलं. आधी छोटसं झोपडं होतं. त्यानंतर घराचं बांधकाम करुन घेतलं असं यावेळी स्नेहलने सांगितलं. स्नेहल आणि तिच्या कुटुंबीयांनी खूप संघर्ष केला आहे. अवघ्या लहानशा घरातून ते चाळीत घर खरेदी करण्यापर्यंतचा संघर्षही खूप मोठा होता. कुटुंबाची आर्थिक परिस्थितीही तितकी चांगली नव्हीत. तिने एक डान्स शो करत असतानाचा किस्सा सांगितला. स्नेहल म्हणाली, “मी डान्स शो करत होते आणि घरातलेही सगळेच बाहेर गेले होते. चाळ म्हटल्यावर घरात उंदीर असणारच. घरात जेवण बनवून ठेवलं होतं, पण रात्री जेव्हा आम्ही घरी परतलो तेव्हा उंदरांनी जेवणाची नासाडी केली होती. तेव्हा माझ्या वडिलांनी निर्णय घेतला की, आज मुलांच्या पुढ्यातलं अन्न गेलं आहे हे परत कधीच घडू नये म्हणून त्यांनी घर रिनोव्हेट करून घेतलं.” स्नेहल कॉलेजला असल्यापासूनच घरात आर्थिक मदत करायची. तर, तिची आई दुसऱ्यांच्या घरी जेवण बनवण्याचं काम करायची. या मुलाखतीत स्नेहलने तिच्या घराची आणि कुटुंबियांची गोष्ट सांगितलं. शिवाय आपल्याला चाळीत राहत असल्याची कोणत्याच प्रकारची लाज वाटत नाही, असंही ती म्हणाली होती. (सर्व फोटो - स्नेहल शिदमच्या इन्टाग्रामवरून साभार)