“असे कर्म दरिद्री कलाकार पाहिल्यावर…”, दिग्दर्शक महेश टिळेकरांची संतप्त पोस्ट, नेमकं काय घडलं?

महेश टिळेकर हे मराठी चित्रपटसृष्टीतील प्रसिद्ध दिग्दर्शक म्हणून ओळखले जातात. त्यांच्या ‘मराठी तारका’ या कार्यक्रमाला प्रेक्षकांनी भरभरून प्रतिसाद दिला होता. सामाजिक किंवा कलाक्षेत्रात घडणाऱ्या अनेक विषयांवर महेश टिळेकर परखडपणे आपलं मत मांडत असतात. सध्या त्यांची "कृतज्ञ आणि कृतघ्न कलाकार" ही फेसबुक पोस्ट चांगलीच चर्चेत आली आहे. काही वर्षांपूर्वी महेश टिळेकरांनी मराठी कलाविश्वातील काही निवडक तंत्रज्ञ आणि कलाकारांना मुंबईत माफक दरात सरकारी योजनेतून घरं मिळवून दिली होती. परंतु, संबंधित मराठी कलाकारांना घरांचा ताबा मिळाल्यावर त्यांनी सरड्याप्रमाणे रंद बदलले. तसंच काही जणांनी चांगली किंमत आल्यावर ही घरं विकली. असं त्यांनी पोस्टमध्ये म्हटलं आहे. महेश टिळेकर लिहितात, "असे कर्म दरिद्री कलाकार पाहिल्यावर आपल्या ह्याच मराठी कलाकारांसाठी आपण रक्त आटवून प्रयत्न केले याचा पश्चाताप नक्कीच झाला." पुढे या पोस्टमध्ये त्यांनी दोन मराठी कलाकारांबद्दलचे अनुभव त्यांचं नाव न घेता सांगितले आहेत. त्यापैकी एका कलाकाराला महेश टिळेकरांनी गरजेला आर्थिक मदत केली होती. परंतु, संबंधित कलाकाराने त्यांचे पैसे वेळेत परत दिले नाहीत. तसेच अभिनेत्रीबद्दलचा अनुभव सांगताना महेश टिळेकर म्हणाले, "पाच वर्षांनी त्या अभिनेत्रीने सरकारी योजनेतील तो फ्लॅट विकला तेव्हा चांगला व्ह्यू असल्यामुळे तिला त्या फ्लॅटचे अधिक पैसे मिळाले होते." महेश टिळेकर यांनी शेअर केलेल्या या संतप्त फेसबुक पोस्टची सध्या चांगलीच चर्चा सुरु आहे. फोटो सौजन्य : महेश टिळेकर फेसबुक