आईला ‘अम्मी’ म्हणतो गश्मीर, कारण सांगताना वडील रवींद्र महाजनींचा उल्लेख करत म्हणाला, “खूप लहान असताना…”

गश्मीर महाजनी हा लोकप्रिय मराठी अभिनेता आहे. त्याने मराठीसह हिंदी मालिकांमध्येही काम केलंय. मराठी अभिनेता गश्मीर महाजनी सोशल मीडियावर खूप सक्रिय आहे. तो सोशल मीडियावर चाहत्यांशी संवाद साधतो, चाहत्यांच्या अनेक प्रश्नांची उत्तरं देत असतो. तो आईला कोणत्या नावाने हाक मारतो, याचा खुलासा त्याने केला आहे. तसेच त्यामागचं कारणही त्याने सांगितलं आहे. गश्मीर आईला आई म्हणत नाही तर अम्मी म्हणतो. त्याच्या आईचं नाव माधवी महाजनी आहे. रविवारी गश्मीरने इन्स्टाग्रामवर ‘Ask Gash’ हे सेशन ठेवलं होतं. यावेळी बहिणीबद्दल बोलताना त्याने आईचा उल्लेख अम्मी असा केला होता. त्यानंतर त्याला आईला अम्मी म्हणण्यामागचं कारण विचारण्यात आलं, त्याचं उत्तर गश्मीरने दिलं. तुम्ही तुमच्या आईला अम्मी का म्हणता, असा प्रश्न त्याला एका चाहत्याने विचारला. त्याचं उत्तर देताना गश्मीरने कारण सांगितलं. “माझे वडील त्यांच्या आईला याच नावाने हाक मारायचे, खूप लहान असताना ऐकले होते, तेव्हापासून हे नाव तोंडात बसले,” असं गश्मीर म्हणाला. गश्मीर महाजनी हा दिवंगत अभिनेते रवींद्र महाजनी व माधवी महाजनींचा मुलगा आहे. गश्मीरला रश्मी नावाची मोठी बहीण आहे, ती त्याच्यापेक्षा १३ वर्षांनी मोठी आहे. (गश्मीरचे फोटो त्याच्या इन्स्टाग्रामवरून साभार, इतर फोटो सोशल मीडियावरून साभार)