छातीत येणारी कळ असू शकते फुफ्फुसाच्या कर्करोगाचे लक्षण; शरीरात होणाऱ्या ‘या’ बदलांकडे चुकूनही दुर्लक्ष करू नका

जागतिक आरोग्य संघटनेच्या अहवालानुसार कर्करोग हा जगातील सर्वात मोठा मारक ठरत आहे. बदलती जीवनशैली आणि आहारपद्धती अशा अनेक गोष्टींमुळे जगभरात कर्करोगाचे प्रमाण वाढत चालले आहे. जीवघेण्या कर्करोगाच्या रूग्णांच्या संख्येत मोठी वाढ पहायला मिळत आहे. वर्ल्ड हेल्थ ऑर्गनायझेशनच्या कर्करोग एजन्सीने अंदाज वर्तवला आहे की, २०५० पर्यंत नवीन कर्करोगाच्या रुग्णांची संख्या तब्बल ७७ टक्क्यांनी वाढेल. इंटरनॅशनल एजन्सी फॉर रिसर्च ऑन कॅन्सर (आयएआरसी) नुसार २०५० पर्यंत कर्करोगाच्या रुग्णांची संख्या ३५ दशलक्षांपेक्षा जास्त होण्याची शक्यता वर्तवली जात आहे. अशा गंभीर प्रसंगी आपण आपल्या आरोग्याची स्वतः काळजी घ्यायला हवी. यासाठी आपल्या शरीरात दिसणाऱ्या लहान लहान बदलांकडे पूर्ण लक्ष द्यायला हवे. कदाचित हे बदल भविष्यातील गंभीर आजारांची लक्षणे असू शकतात. फुफ्फुसाच्या कॅन्सरची सुरुवातीची लक्षणे दिसत नाहीत, पण शरीरातील काही बदलांकडे लक्ष दिल्यास हा आजार सहज ओळखता येऊ शकतो. ब्रिटनच्या कॅन्सर रिसर्च टीमच्या मते, फुफ्फुसाच्या कर्करोगाच्या ७९ टक्के प्रकरणांमध्ये, या आजाराची लक्षणे वेळेत ओळखता आल्यास हा रोग उपचाराने बरा होऊ शकतो. फुफ्फुसाच्या कर्करोगाची अनेक कारणे असू शकतात जसे की आनुवंशिकता, वय, जास्त धूम्रपान, कौटुंबिक इतिहास, खराब खाण्याच्या सवयी आणि जीवनशैली, इत्यादी. फुफ्फुसाच्या कर्करोगाला सायलेंट किलर असेही म्हणतात. हा आजार साधारणपणे ते दोन प्रकारचा असतो. नॉन-स्मॉल सेल कार्सिनोमा (NSCLC) आणि स्मॉल सेल कार्सिनोमा (SCLC). सामान्यतः दिसणारी लक्षणे फुफ्फुसाच्या कर्करोगाची सुरुवातीची लक्षणे असू शकतात. जसे की तीन आठवड्यांपेक्षा जास्त काळ सतत खोकला, छातीत तीव्र संसर्ग. खोकल्याबरोबर रक्त येणे, श्वास घेताना किंवा खोकताना रक्त येणे, सतत थकवा जाणवणे ही देखील त्याची लक्षणे असू शकतात. वजन कमी होणे, भूक न लागणे, चेहरा किंवा मानेवर सूज येणे, घसा बसणे, छातीत कळ येणे ही त्याची सुरुवातीची लक्षणे असू शकतात. येथे देण्यात आलेली माहिती गृहीतके आणि सामान्य माहितीवर आधारित आहे. अधिक महितीकरिता कृपया तज्ञांचा सल्ला घ्यावा.