PHOTOS : ठाण्यातील वागळे इस्टेट भागात पाण्याची टाकी फुटली; रहिवाशांच्या घरामध्ये पाणी

ठाण्यातील वागळे इस्टेट येथील इंदिरानगर भागात आज(शनिवार)सकाळी पाण्याची टाकी फुटली. त्यामुळे परिसरातील रहिवाशांच्या घरामध्ये पाणी शिरले आहे. इंदिरानगर ही वस्ती डोंगर उतारावर आहे. येथील रहिवाशांना पाण्याची सुविधा मिळावी म्हणून येथे पाण्याचा साठा करण्यासाठी मोठ्या टाक्या बसविल्या आहेत. आज सकाळी येथील एक टाकी फुटली. त्यामुळे टाकीजवळ आणि डोंगर उतारावर राहणाऱ्यांच्या घरामध्ये पाणी शिरले. यानंतर घटनास्थळी आपत्ती व्यवस्थापन विभाग दाखल झाले. पाण्याचा प्रवाह इतका जास्त होता की, यात सहा घरांचे मोठे नुकसान झाले आहे. या घरांचे छप्पर, भिंती तुटून पडल्या. तर या दुर्घटनेत १५ घरांचे किरकोळ नुकसान झाले आहे. याशिवाय, तानुबाई मुठे (७६) ही महिलाही देखील जखमी झाली असून तिला उपाचारासाठी रुग्णालयात दाखल करण्यात आले आहे. २००९ मध्ये ठाणे महापालिकेने बांधलेल्या या पाण्याच्या टाकीची साठवण क्षमता ७५००० लिटर आहे. टाकी कशामुळे फुटली? या दुर्घटनेत किती जणांचे नुकसान झाले? याबाबत प्रशासन आता माहिती घेत आहे.