Photos : ‘लालबागचा राजा’च्या चरणी कोट्यवधींचे दान; पहिल्या पाच दिवसांत देणगी स्वरुपात मिळाली ‘इतकी’ रक्कम

करोना महामारीनंतर तब्बल दोन वर्षांनी राज्यातील गणेशोत्सव कोणत्याही निर्बंधांविना मोठ्या धुमधडाक्यात साजरा होत आहे. गणेशोत्सवाची खास परंपरा असलेली मुंबईतील लालबागनगरी भक्तांनी गजबजून गेली आहे. आपल्या लाडक्या बाप्पाचे दर्शन घेण्यासाठी भाविक गर्दी करत आहेत. भाविकांचे श्रद्धास्थान आणि नवसाला पावणारा अशी ख्याती असलेला बाप्पा म्हणजे लालबागचा राजा. लालबागचा राजाच्या दर्शनासाठी मुंबईबाहेरूनही भाविक येत असतात. करोनामुळे यंदा दोन वर्षांनंतर बाप्पाचे दर्शन घेण्यासाठी लाखो भाविक राजाच्या दरबारात गर्दी करत आहेत. अनेक सेलिब्रिटी आणि राजकीय नेत्यांनीही लालबागचा राजाचे दर्शन घेण्यासाठी हजेरी लावली. दरवर्षी लालबागचा राजाच्या दानपेटीतही भाविकांकडून मोठी रक्कम देणगी स्वरुपात जमा होते. यंदा पहिल्या पाच दिवसांत बाप्पाच्या दानपेटीत कोट्यवधी रुपयांची देणगी जमा झाली आहे. टाइम्सने दिलेल्या वृत्तानुसार राजाच्या दानपेटीत दोन कोटी ४९ लाख ५० हजार रोख रक्कम देणगी स्वरुपात जमा झाली आहे. याशिवाय २५० तोळे सोने आणि २९ किलो चांदीचे दान बाप्पाच्या चरणी भाविकांनी अर्पण केले आहेत. येत्या दिवसांत राजाच्या दानपेटीत आणखी देणगी जमा होईल. दरवर्षी लालबागचा राजाच्या दानपेटीत किती देणगी जमा होते याची अधिकृत माहिती मंडळाकडून दिली जाते. (सर्व फोटो : लालबागचा राजा/ इन्स्टाग्राम ) (हेही पाहा : पत्नी, नातवंडांसह गृहमंत्री अमित शाहांनी घेतलं ‘लालबागचा राजा’चं दर्शन, फोटो पाहा…)