PHOTOS: “भाजपाने लोकशाहीची हत्या केली” सपा प्रमुख अखिलेश यादव यांचा आरोप, भाजपाविरोधात लखनऊत तीव्र आंदोलन

उत्तर प्रदेशातील लखनऊमध्ये राज्य विधान भवनावर समाजवादी पक्षाने आज मोर्चा काढला होता. हा मोर्चा पोलिसांकडून रोखण्यात आला. देशातील बरोजगारी आणि महागाईविरोधात समाजवादी पक्ष आक्रमक झाला आहे. समाजवादी पक्षाचे अध्यक्ष आणि उत्तर प्रदेशातील विरोधी पक्षनेते अखिलेश यादव यांच्या नेतृत्वात हा मोर्चा काढण्यात आला. आंदोलनादरम्यान अखिलेश यादव आणि सपा आमदारांनी रस्त्यावर बसून भाजपाविरोधात जोरदार घोषणाबाजी केली. या मोर्चाला पोलिसांनी परवानगी नाकारल्यानंतरही मोठ्या संख्येने सपा कार्यकर्ते रस्त्यावर उतरले होते. केंद्राच्या 'अग्निवीर' योजनेबाबत तरुणांमध्ये रोष आहे. या योजनेविरोधात आंदोलन करणाऱ्या तरुणांविरोधात खोटे खटले दाखल करण्यात आल्याचा आरोप अखिलेश यादव यांनी केला आहे. "भाजपा सरकार सर्व विकत चालली आहे. रेल्वे, विमान, एयरपोर्ट भाजपाने विकले आहे", असा आरोप अखिलेश यादव यांनी केला आहे. देशातील दलित आणि गरिबांना भारतीय संविधानाने जे अधिकार दिले आहेत, ते खाजगीकरणामुळे हिरावल्याचा आरोप यादव यांनी केला आहे. अतिवृष्टीमुळे उत्तर प्रदेशातील शेतकऱ्यांचे अतोनात नुकसान झाले आहे. नुकसानग्रस्त शेतकऱ्यांना राज्य सरकारने कुठलीही मदत केली नाही, असे यादव म्हणाले आहेत. भाजपा लोकशाहीने दिलेल्या अधिकारांचे उल्लंघन करत असल्याचा आरोप सपा कार्यकर्त्यांनी आंदोलनादरम्यान केला. यावेळी भाजपा सरकारविरोधात जोरदार घोषणाबाजी करण्यात आली. उत्तर प्रदेश विधानसभेचे पावसाळी अधिवेशन सुरू होताच समाजवादी पक्षाकडून सत्ताधाऱ्यांविरोधात आंदोलन करण्यात आले. या आंदोलनादरम्यान शहरात चोख सुरक्षा व्यवस्था तैनात करण्यात आली होती. बेरोजगारी, महागाई, वीज पुरवठ्याचा अभाव आणि राज्यातील महिलांवरील अत्याचाराविरोधात सपा कार्यकर्त्यांनी अखिलेश यादव यांच्या नेतृत्वात हे आंदोलन केले. कायदा आणि सुव्यवस्थेचे समाजवादी पक्षाच्या नेत्यांनी पालन करावे, ही फारच मोठी अपेक्षा असल्याचा टोला उत्तर प्रदेशचे मुख्यमंत्री योगी आदित्यनाथ यांनी लगावला आहे.