Republic Day 2023 : प्रजासत्ताक दिनानिमित्त पुण्यातील विद्यार्थ्यांकडून मानवी प्रतिकृतीद्वारे स्वातंत्र्य सैनिकांना मानवंदना; पाहा PHOTOS

भारतात दरवर्षी २६ जानेवारीला मोठ्या उत्साहात प्रजासत्ताक दिन साजरा केला जातो. यंदा भारत आपला ७४ वा प्रजासत्ताक दिन साजरा करणार आहे. करोनांतर पहिल्यांदाच प्रजासत्ताक दिन मोठ्या उत्साहात साजरा करण्यात येत आहे. यासाठी सर्व सरकारी कार्यालय आणि शाळा-महाविद्यायलये सज्ज झाली आहेत. दरम्यान, प्रजासत्ताक दिनाच्या पार्श्वभूमीवर पुण्यातील झील एज्युकेशन सोसायटीच्या विद्यार्थ्यांनी देशाच्या स्वातंत्र्य लढ्यामध्ये योगदान असणाऱ्या महापुरुषांना मानवी प्रतिकृती द्वारे मानवंदना दिली आहे. गेल्या तीन वर्षांपासून ही यशस्वी परंपरा सुरू असून यंदाही झील एज्युकेशन सोसायटीने अनोखा विक्रम केला आहे. पुण्यातील झील एज्युकेशन सोसायटी ही संस्था गेली २६ वर्षे शिक्षण क्षेत्रातील अग्रगणी संस्था आहे. हा उपक्रम २५ जानेवारी २०२३ रोजी सकाळी ९ वाजता संस्थेच्या प्रांगणात साकारला गेला. या उपक्रमाची सुरुवात ध्वजारोहण व दीपप्रज्वलनाने संस्थेचे सचिव डॉ. जयेश काटकर यांच्या हस्ते झाली. या उपक्रमामध्ये संस्थेचे ३७०० हून अधिक विद्यार्थी सहभागी झाले होते. तर ५०० हून अधिक स्वयंसेवकांनी गेल्या एक महिन्यापासून हा उपक्रम यशस्वीरित्या पार पाडण्यासाठी अथक परिश्रम घेतले. या कार्यक्रमाद्वारे एकता आणि शांततेचा संदेश देशातील युवा तरुणांपर्यंत पोहोचवण्याचा उद्देश असल्याचे संस्थेकडून सांगण्यात आलं. या उपक्रमामध्ये देशात राष्ट्रध्वज, नेताजी सुभाष चंद्र बोस, भारतरत्न डॉ. बाबासाहेब आंबेडकर, मौलाना अबुल कलाम आझाद, लोकमान्य बाळ गंगाधर टिळक व राष्ट्रपिता महात्मा गांधी या महापुरुषांची मानवी प्रतिकृती साकारून मानवंदना दिली गेली. फोटो सौजन्य - अरूल होरीजन (एक्सप्रेस फोटो)