बंडखोरीनंतर स्थापन केला स्वतःचा पक्ष; तुरुंगवासानंतर थेट मुख्यमंत्री! ३२ पैकी ३१ जागा जिंकणारे प्रेमसिंग तमांग कोण?

अरूणाचल प्रदेश आणि सिक्कीम या दोन राज्यांच्या विधानसभा निवडणुकीचे निकाल काल जाहीर झाले. (All Photos- Prem Singh Tamang/X) यात अरुणाचल प्रदेशात ६०पैकी ४६ जागा मिळवून भाजपाने एकतर्फी विजय मिळविला. सिक्कीममध्ये सिक्कीम क्रांतीकारी मोर्चा (एसकेएम) पक्षाने ३२ पैकी ३१ जागा जिंकून निर्भेळ यश मिळविले. तेथे भाजपाचे सर्व १२ आमदार पराभूत झाले असले, तरी निकालानंतर एसकेएमचे नेते व मुख्यमंत्री प्रेमसिंग तमांग यांनी आपण राष्ट्रीय लोकशाही आघाडीबरोबरच राहणारं असल्याचे म्हटले आहे. तमांग यांनी २०१९ सालच्या विधानसभा निवडणुकीत १७ जागांवर विजय मिळवला होता. त्यांच्या या विजयामुळे जवळपास पाच टर्म सत्तेत असलेलं चामलिंग यांचं तख्त पलटी झालं. प्रेमसिंग तमांग पवनकुमार चामलिंग यांच्या एसडीएफ या पक्षाचे सदस्य होते. त्यांनी २०१३ मध्ये बंडखोरी केली तसेच एस.के.एम. या स्वतःच्या पक्षाची स्थापना केली. भ्रष्टाचार ते कुशासन असे लोकांच्या मनात घर करणारे मुद्दे घेऊन त्यांनी वर्षभरातच झालेली विधानसभा निवडणूक लढवत, त्यामध्ये १० जागांवर विजय मिळवला. दरम्यान प्रेमसिंग तमांग हे एका सरकारी शाळेचे शिक्षक होते. त्यांनी तीन वर्ष नोकरी केली. त्यानंतर राजकीय प्रवेश करून त्यांची कारकीर्द सुरु झाली. एसडीएफ पक्षाच्या निर्मितीत त्यांचा मोठा वाटा मानाला जातो. खडतर वाटचालीतून पुढे आलेले प्रेमसिंग तमांग, १९९५ सालापासून सलग ५ वेळा विधानसभेवर निवडून गेले. एसडीएफमध्ये असताना ते मंत्रिमंडळात मंत्री म्हणूनही काम करत होते. प्रेमसिंग तमांग यांना आर्थिक गैरव्यवहार प्रकरणात दोषी ठरवून त्यांना २०१६ मध्ये तुरुंगवास झाला. दोन वर्ष झाल्यांनतर २०१८ मध्ये ते तुरुंगातून बाहेर आले. त्यावेळी त्यांचं कार्यकर्त्यांनी जंगी स्वागत केलं.