Kolkata Rape Murder Case: देशभरातील डॉक्टर आक्रमक; २४ तास दवाखाने राहणार बंद, आयएमएकडून संपाची घोषणा

संपूर्ण राज्यासह देशात आज अत्यावश्यक सेवा वगळता निवासी डॉक्टरांचे काम बंद आंदोलन आहे. कोलकातामधील महिला डॉक्टरवर झालेल्या अत्याचाराचा निषेध निवासी डॉक्टर नोंदवणार आहेत. शनिवारी सकाळी सहा ते रविवारी सकाळी सहा या २४ तासांत फक्त खासगी रूग्णालयांमध्ये केवळ आपत्कालीन सेवाच सुरू राहणार असल्याची माहिती आयएमएने दिली आहे. इंडियन मेडिकल असोसिएशन एकजुटीने या संपामध्ये उतरणार आहे. दरम्यान वैद्यकीय महाविद्यालयातील निवासी डॉक्टरांच्या आंदोलनाचा आजचा चौथा दिवस आहे. आता इंडियन मेडिकल असोसिएशनने देखील पाठिंबा दर्शवत संप पुकारला आहे. दरम्यान, कोलकात्यातील महिला डॉक्टरवरील बलात्कार व हत्येप्रकरणी देशभरात आंदोलन सुरु असताना इंडियन मेडिकल असोसिएशनने (IMA) काही मागण्या ठेवल्या आहेत. त्यानुसार रुग्णालयात विमानतळासारखी सुरक्षा व्यवस्था ठेवण्यात यावी अशी मागणी करण्यात आली आहे. निवासी डॉक्टरांच्या कामाच्या आणि राहण्याच्या स्थितीत बदल करावा. निश्चित वेळेत या प्रकरणाची चौकशी आणि पीडित कुटुंबाला योग्य आर्थिक मदत सरकारकडून देण्यात यावी, असे IMA ने म्हटले आहे. दरम्यान, महिला डॉक्टरवरील बलात्कार हत्या प्रकरणाचा तपास आता सीबीआयकडे सोपवण्यात आलाय. हायकोर्टाने हा तपास सीबीआयकडे देण्याचे आदेश दिले होते. सध्या कोलकाता शहरात तणावाची स्थिती आहे. (Photos : Express Photos) सर्व छायाचित्रे काल मुंबईसह दिल्लीमध्ये झालेल्या तीव्र आंदोलनादरम्यानची आहेत.