Ahmedabad Plane Crash: अहमदाबादवरून लंडनला जाणारं प्रवासी विमान कोसळलं; पाहा काळजाचा थरकाप उडवणारे फोटो

Air India Plane Crash Ahmedabad Gujarat: अहमदाबादमधील मेघानी नगर परिसरात एअर इंडियाच्या एआय-१७१ (बोइंग ७८७-८ ड्रीमलायनर विमान – सीरियल नंबर ३६२७९) या प्रवासी विमानाचा अपघात झाला आहे. २४२ प्रवाशांना घेऊन हे विमान अहमदाबादवरून लंडनला जात होते. तसेच यात दोन पायलटसह १२ क्रू सदस्य होते. अहमदाबादमधील सरदार वल्लभभाई आंतरराष्ट्रीय विमानतळाच्या सीमेजवळच ही दुर्घटना घडली आहे. या विमानाने अहमदाबाद विमानतळावरून उड्डाण केल्यानंतर काहीच मिनिटात (७ किमी दूर) ते कोसळले. विमान कोसळल्यानंतर मोठा स्फोट होऊन विमानाने पेट घेतला आहे. ज्या ठिकाणी विमान कोसळलेय तिथून धुराचे लोट निघत असल्याचे दिसत आहे. हे विमान रहिवासी भागात कोसळल्यामुळे मोठी हानी झाली असण्याची शक्यता वर्तवली आहे. अहमदाबाद पोलीस व अग्निशमन दलाने बचावकार्य सुरू केले आहे. या विमान दुर्घटनेची माहिती मिळताच केंद्रीय गृहमंत्री अमित शाह यांनी गुजरातचे मुख्यमंत्री भूपेंद्र पटेल व अहमदाबादच्या पोलीस आयुक्तांना फोन करून केंद्र सरकारकडून पूर्ण मदतीचे आश्वासन दिले आहे. (सर्व फोटो सौजन्य : PTI, ANI आणि सोशल मीडिया)