Photo : ऋषभ पंत अन् हार्दिक पंड्याची फटकेबाजी ते मैदानावर शॅम्पेनचा पाऊस! भारताचा इंग्लंडवर ऐतिहासिक विजय

इंग्लंडविरुद्ध सुरू असलेली तीन एकदिवसीय सामन्यांची मालिका भारताने २-१ अशा फरकाने जिंकली. टी २० मालिकेपाठोपाठ एकदिवसीय मालिकेतही यजमानांना भारताकडून पराभव स्वीकारावा लागला. निर्णायक सामन्यात ऋषभ पंत आणि हार्दिक पंड्या भारताच्या विजयाचे शिल्पकार ठरले. यष्टीरक्षक ऋषभ पंतने आपल्या एकदिवसीय कारकिर्दीतील पहिले शतक झळकावले. त्याने चौफेर फटकेबाजी करत नाबाद १२५ धावांची खेळी केली. ५५ चेंडूत ७१ धावा करून हार्दिक पंड्याने त्याला मोलाची साथ दिली. हार्दिक पंड्याने गोलंदाजीमध्येही चार बळी घेऊन चमकदार कामगिरी केली. क्षेत्ररक्षणामध्ये 'सर' रविंद्र जडेजाने आपली कमाल दाखवली. रीस टॉपली हा इंग्लंडचा सर्वात यशस्वी गोलंदाज ठरला. त्याने भारताचे तीन गडी बाद केले. कर्णधार जोस बटलरने अर्धशतकी खेळी करून इंग्लंडच्या डावाला आकार देण्याचा प्रयत्न केला होता. भारताने मालिका जिंकल्यानंतर कर्णधार रोहित शर्माला इतर खेळाडूंनी शॅम्पेनने अक्षरश: आंघोळ घातली. इंग्लंडमध्ये द्विपक्षीय एकदिवसीय मालिका जिंकण्याची कामगिरी करणारा रोहित तिसरा कर्णधार ठरला आहे. (सर्व फोटो सौजन्य - आयसीसी/बीसीसीआय ट्विटर)