Photos: नातवंडांच्या हट्टासाठी पुन्हा बोहल्यावर चढले राज्यातील माजी राज्यमंत्री

अकोल्यात नुकताच शाही विवाहसोहळा पार पडला. माजी राज्यमंत्री गुलाबराव गावंडे पुन्हा एकदा विवाह बंधनात अडकले. नातवांच्या हट्टापायी गुलाबराव गावंडे पुन्हा एकदा बोहल्यावर चढले. गुलाबराव गावंडे हे माजी राज्यमंत्री आणि राष्ट्रवादीचे नेते तर राष्ट्रवादी काँग्रेसचे जिल्हाध्यक्ष संग्राम गावंडे यांचे वडील. ११ मे रोजी गुलाबराव गावंडे आणि आशा गावंडे यांच्या लग्नाचा ४१ वा वाढदिवस होता. लग्नाच्या वाढदिवशी पुन्हा एकदा विवाह करण्याचे ठरले होते. अकोल्यातील फार्मसी महाविद्यालयात गुलाबराव गावंडे आणि आशा गावंडे यांचा लग्नाच्या वाढदिवशी पुन्हा शाही विवाह सोहळा पार पडला. या विवाहसोहळ्याला जिल्ह्यातील सर्वच राजकिय नेते, उद्योजक, अधिकारी, यांच्या सह मोठ्या संख्येने नागरिक उपस्थित होते. या अनोख्या विवाहसोहळ्याची अकोल्यात चर्चा होती. एकेकाळी पश्चिम विदर्भातील शिवसेनेचा चेहरा म्हणून गावंडे यांची ओळख होती. मनोहर जोशींच्या युती शासनाच्या काळात त्यांच्याकडे क्रीडा राज्यमंत्रीपदाची जबाबदारी होती. गुलाबराव गावंडे यांनी कारंजा, बोरगांव मंजू, अकोट या विधानसभा मतदारसंघाचे प्रतिनिधित्व केलेले आहे. २०१४ च्या विधानसभा निवडणुकीत त्यांना अकोला पश्चिम मतदारसंघातून पराभवाचा सामना करावा लागला. गुलाबराव गावंडे यांनी धनुष्यबाण सोडून हातात घड्याळ बंधले. गुलाबराव गावंडे यांनी शिवसेनेला सोडचिठ्ठी देत राष्ट्रवादी काँग्रेसमध्ये प्रवेश केला.