Photos : केजरीवालांविरोधात दिल्लीतून लढणाऱ्या भाजपा उमेदवार ते निलंबित प्रवक्त्या… कोण आहेत नुपूर शर्मा?

भाजपाने रविवारी (५ जून) आपल्या राष्ट्रीय प्रवक्त्या नुपूर शर्मा यांना निलंबित केलं. नुपूर शर्मा यांनी एका इंग्रजी वृत्तवाहिनीवर चर्चेदरम्यान इस्लामचे संस्थापक प्रेषित मोहम्मद यांच्याबद्दल अपमानास्पद वक्तव्य केलं होतं. नुपूर शर्मांच्या वक्तव्यानंतर मुस्लीम गटांनी निदर्शने सुरू केली. सौदी अरेबिया, इराण, पाकिस्तान अशा राष्ट्रांनी शर्मा यांच्या या टिप्पणीनंतर नाराजी व्यक्त केली आहे. यामुळे भाजपाने नुपूर शर्मा यांना सहा वर्षांसाठी पक्षाच्या प्राथमिक सदस्येतेतून निलंबित केले असून त्यांना सर्व जबाबदाऱ्यांमधून मुक्त करण्यात आले आहे. भारतानेही आंतराष्ट्रीय पातळीवर आपली बाजू स्पष्ट करत नुपूर शर्मा यांची टिप्पणी आणि भारत सरकारचा संबंध नसल्याचे सांगितले आहे. भाजपाने निलंबनाची कारवाई केल्यानंतर नुपूर शर्मा चर्चेत आल्या आहेत. नुपूर शर्मा या व्यवसायाने वकील आहेत. त्यांनी अर्थशास्त्र आणि वकिली विषयात पदवी पर्यंतचे शिक्षण घेतले आहे. लंडनमधून नुपूर शर्मा यांनी वकिलीमधील पदव्युत्तर डिग्री संपादन केली आहे. कॉलेजमध्ये असतानाच नुपूर शर्मा यांच्या राजकीय कारकिर्दीला सुरुवात झाली. दिल्ली विद्यापीठाच्या विद्यार्थी संघाच्या त्या अध्यक्षा होत्या. अखिल भारतीय विद्यार्थी परिषदेच्या तिकीटावर नुपूर शर्मा निवडून आल्या होत्या. नुपूर शर्मा या भारतीय जनता युवा मोर्चाच्या कमिटीमध्येही होत्या. भारतीय जनता पक्षाच्या सक्रिय आणि कार्यक्षम प्रवक्त्या म्हणून त्यांच्याकडे पाहिलं जायचं. दिल्लीचे मुख्यमंत्री आणि आम आदमी पार्टीचे अध्यक्ष अरविंद केजरीवाल यांच्याविरोधात नुपूर शर्मा यांना भाजपाकडून उमेदवारी देण्यात आली होती. परंतु, निवडणुकीत नुपूर शर्मा यांना पराभव पत्करावा लागला. दरम्यान, भाजपने निलंबनाची कारवाई केल्यानंतर नुपूर शर्मा यांनी त्यांचे वादग्रस्त वक्तव्य मागे घेतले आहे. "कुणाच्याही धार्मिक भावना दुखावण्याचा आपला कधीही उद्देश नव्हता", असं त्यांनी म्हटलं आहे. (सर्व फोटो : नुपूर शर्मा/ इन्स्टाग्राम)