PHOTOS : भारताला मिळाले ८ चित्ते, नामिबियातून आणण्यासाठी हवाई दलाचे विशेष विमान; पंतप्रधान मोदींनी सोडलं कुनो नॅशनल पार्कमध्ये

आज भारताचे पंतप्रधान नरेंद्र मोदींचा ७२ वा वाढदिवस आहे. वाढदिवसानिमित्त मोदींवर जगभरातून शुभेच्छांचा वर्षाव होत आहे. भारतातसह परदेशातील अनेक नेत्यांनी मोदींना वाढदिवसानिमित्त शुभेच्छा दिल्या आहेत. भारतीय वाळू कलाकार सुदर्शन पटनायक यांनी ओडिशाच्या समुद्र किनाऱ्यांवर चहाच्या मातीच्या कपांचा वापर करुन मोदींना विशेष पद्धतीने शुभेच्छा दिल्या आहेत. पंतप्रधान मोदींनी आपल्या वाढदिवसानिमित्त भारतीय नागरिकांना एक खास गिफ्ट दिलं आहे. भारतातून नामशेष झालेले चित्ते पुन्हा भारतात परतले आहेत. तब्बल ७० वर्षानंतर अफ्रिकेच्या नामिबियातून ८ चित्त्यांना भारतात आणण्यात आलं आहे. या ८ चित्त्यांमध्ये पाच मादी आणि तीन नर आहेत. वायू दलाच्या विशेष विमान कार्गो फ्लाइट बोइंग-७१७ने त्यांना भारतात आणण्यात आलं. या चित्त्यांना घेऊन हे विमान ग्वाल्हेर विमानतळावर उतरले. यावेळी विमानतळावर नरेंद्र मोदींसह नागरी विमान वाहतूक मंत्री ज्योतिरादित्य एम सिंधिया उपस्थित होते. त्यानंतर हवाई दलाच्या हॅलिकॉप्टरने या चित्त्यांना कुनो नॅशनल पार्कमध्ये आणण्यात आले. चित्त्यांना एका महिन्यासाठी लहान प्रदेशात ठेवले जाईल आणि यानंतर दोन महिन्यांसाठी परिसराची ओळख होण्यासाठी मोठ्या भागात सोडले जाईल. यानंतर त्या चित्त्यांना जंगलात सोडण्यात येईल. पंतप्रधान नरेंद्र मोदींनी मध्य प्रदेशातील कुनो नॅशनल पार्कमध्ये आणलेले चित्ते सोडले यावेळी मोदींना चित्त्यांचा फोट काढण्याचा मोह आवरता आला नाही.