व्हॉटसअ‍ॅप डाऊन झाल्याने नेटकरी सुसाट, सोशल मीडियावर Memes चा पाऊस

हल्लीच्या जगात प्रत्येकाच्या दैनंदिन आयुष्याचा अविभाज्य भाग झालेले व्हॉट्सअॅप भारतात डाऊन झालं आहे. याचा फटका कोट्यावधी युजर्सला बसला. भारतीय प्रमाणवेळेनुसार मंगळवारी दुपारी १२च्या सुमारास डाऊन झालं. काही तांत्रिक बिघाडामुळे व्हॉट्सअॅप डाऊन झाल्याचं सांगितलं जात आहे. सुरुवातीला आधी काही काळ व्हॉट्सअॅप ग्रुपवर मेसेजेस पाठवता येत नव्हते. त्याबरोबरच पर्सनल चॅटवरही ब्लू टिक दिसणं बंद झालं. यानंतर काही वेळाने पर्सनल चॅटदेखील बंद झाले आहेत. व्हॉट्सअॅप डाऊन झाल्याची बातमी सोशल मीडियावर व्हायरल होताच सोशल मीडियावर मीम्सचा पाऊस सुरु झाला. जगभरातील नेटकऱ्यांनी व्हॉट्सअॅप डाऊन झाल्यानंतर मीम्स शेअर करायला सुरुवात केली. तर अनेकांनी व्हॉट्सअॅपची खिल्ली उडवत ते डिलीट करत असल्याचे सांगितले. सध्या सोशल मीडियावर अनेक फोटो, व्हिडीओ, गीफ फाईल्स व्हायरल होताना दिसत आहेत. अनेक नेटकरी सातत्याने ट्विटरवर विविध मीम्स शेअर करत आहेत. दरम्यान, गेल्या अर्ध्या तासापासून व्हॉट्सअॅपच्या सर्व्हरमध्ये बिघाड झाल्याची प्राथमिक माहिती मिळत आहे. यासंदर्भात व्हॉट्सअॅपकडून अद्याप अधिकृत माहिती समोर आलेली नाही. त्यामुळे हा बिघाड नेमका कधीपर्यंत दुरुस्त होईल? अशी विचारणा नेटकऱ्यांकडून केली जात आहे.