Ram Navami 2024: रामनवमीनिमित्त सात वर्षाच्या बालकलाकाराने साकारले प्रभू श्री रामाचे विश्वविक्रमी पोर्ट्रेट

रामनवमी हा हिंदू धर्मातील प्रमुख सणांपैकी एक आहे. रामनवमी हा सण चैत्र महिन्याच्या शुक्ल पक्षाच्या नवमीला साजरा केला जातो. रामनवमीनिमित्त मुंबईतील पवईमधील सात वर्षाचा बालकलाकार आयुष सिद्धार्थ कांबळेने प्रभू श्री रामाचे विश्वविक्रमी पोर्ट्रेट साकारले आहे. ३,५०० आर्टिफिशियल फुलांपासून प्रभू श्री रामाचे मोझॅक पोर्ट्रेट साकारले आहे. हे पोर्ट्रेट ३ फुट लांब व ४ फुट रुंद आहे. या पोर्ट्रेटमध्ये ६ रंगाच्या फुलांचा वापर करण्यात आला आहे. हे पोर्ट्रेट पूर्ण करण्यासाठी १२ तासाचा कालावधी लागला आहे. या चित्रातील प्रभू श्री रामाचं स्मितहास्य विशेष आकर्षण ठरत आहे. या पोर्ट्रेटची नोंद वर्ल्ड रेकॉर्ड इंडियामध्ये केली आहे. आयुष हा पवई इंग्लिश हायस्कूलमधील इयत्ता पहिलाचा विद्यार्थी आहे. बालकलाकार आयुष कांबळेने या आधीही साडे चार वर्षाचा असताना माजी मुख्यमंत्री उद्धव बाळासाहेब ठाकरे यांचे पोर्ट्रेट साकारून विश्वविक्रम केला होता. (सर्व फोटो सौजन्य : आयुष कांबळे/सोशल मीडिया)