Photos : महाराष्ट्रातील पहिलं दृष्टीहीन गोविंदा पथक; ‘नयन फाऊंडेशन’च्या सरावाला प्रेरणादायी सुरुवात; पाहा फोटो

मुंबई आणि आसपासच्या परिसरात दरवर्षी दहीहंडीचा उत्सव मोठ्या जल्लोषात साजरा केला जातो. या वर्षीही 'नयन फाऊंडेशन' गोविंदा पथकाने मोठ्या उत्साहात आपल्या सरावाला सुरुवात केली आहे. 'नयन फाऊंडेशन' हे महाराष्ट्रातील पहिलं दृष्टीहीन गोविंदा पथक असून, त्यांनी समाजासमोर एक प्रेरणादायी उदाहरण सादर केलं आहे. दृष्टी नसतानाही उत्साह, चिकाटी व आत्मविश्वास यांच्या जोरावर 'नयन फाऊंडेशन'च्या या तरुण-तरुणींकडून मानवी थर रचण्याचा धाडसी प्रयत्न केला जात आहे. 'नयन फाऊंडेशन'ची स्थापना महाराष्ट्रदिनी म्हणजेच १ मे २०१० रोजी करण्यात आली. 'लोग साथ आ गए और कारवां बनता गया...' या विचारधारेवर विश्वास ठेवणाऱ्या या संस्थेनं आजवर अनेक अंध तरुणांना मुख्य प्रवाहात आणण्याचं कार्य केलं आहे. या प्रवासात अनेक स्वयंसेवकांनीही सहभाग घेतला. कोणी प्रशिक्षण दिलं, कोणी मार्गदर्शन केलं, तर कोणी थरात सहभागी होऊन पाठीशी उभं राहिलं. सन २०१३ मध्ये 'नयन'च्या पथकानं दहीहंडी उत्सवात पहिल्यांदा मानवी थर रचले होते. 'नयन' फाऊंडेशनचा हा उपक्रम केवळ मनोरंजन किंवा साहसापुरता मर्यादित नसून, तो सामाजिक समावेशनाचा खरा अर्थ सांगतो. या गोविंदा पथकातील दृष्टीहीन बांधवांची जिद्द पाहून, आधारिका फाऊंडेशन विशेष सहकार्य करत आहे.