‘मावळ’वरून महायुतीत तिढा? राष्ट्रवादीच्या जागेवर भाजपचा दावा

शिवसेना-भाजप आणि राष्ट्रवादी काँग्रेस महायुती म्हणून एकत्रित विधानसभा निवडणुकीला सामोरी जाणार आहे. ‘ज्या पक्षाचा आमदार, त्या पक्षाला मतदारसंघ’ असे महायुतीचे प्राथमिक सूत्र ठरल्याचे सांगितले जाते. परंतु, घटक पक्षाचा आमदार असलेल्या मावळ मतदारसंघावर भाजपने दावा केला आहे. ही जागा कमळाच्या चिन्हावर लढविण्यासाठी आग्रह धरला आहे.

हेही वाचा : तमिळनाडूमध्ये महिनाभरात ५ राजकीय कार्यकर्त्यांची हत्या; काय आहे कारण?

मावळ विधानसभा मतदारसंघ भाजपचा बालेकिल्ला म्हणून ओळखला जात होता. सलग २५ वर्षांपासून मावळातून भाजपचा आमदार निवडून येत होता. परंतु, २०१९ मध्ये भाजपमध्ये बंडखोरी झाली. पक्षाने बाळा भेगडे यांना उमेदवारी दिल्याने भाजपचे तत्कालीन नगरसेवक असलेल्या सुनील शेळके यांनी राष्ट्रवादी काँग्रेसमध्ये प्रवेश केला. शेळके यांनी राज्यमंत्री असलेले भेगडे यांचा ९० हजारांहून अधिक मतांनी पराभव केला.

मागील पाच वर्षांत आमदार शेळके आणि भाजप पदाधिकारी यांमध्ये विविध कारणांनी खटके उडत राहिले. एका व्यासपीठावर येणेही टाळत होते. राष्ट्रवादी काँग्रेस भाजपसोबत सत्तेत आल्यानंतरही त्यांच्यातील राजकीय मतभेद कमी झाल्याचे दिसले नाही. त्यातच आता भाजपने मावळ मतदारसंघावर दावा केला आहे. त्यामुळे आगामी काळात मावळ भाजप आणि आमदार शेळके यांच्यातील संघर्ष वाढण्याची चिन्हे आहेत.

हेही वाचा : अरविंद केजरीवलांनंतर ‘आप’च्या आणखी एका नेत्याला होणार अटक? कोण आहेत दुर्गेश पाठक?

मावळ तालुक्यातील भाजप पदाधिकारी, कार्यकर्त्यांचा २ ऑगस्टला मेळावा होणार आहे. याबाबत माजी आमदार बाळा भेगडे म्हणाले की, रामभाऊ म्हाळगी यांनी १९५७ ला जनसंघाच्या माध्यमातून मावळ तालुक्याचे विधानसभेत प्रतिनिधित्व केले. १९५७ ते २०२४ या काळात सर्वाधिक वेळा जनसंघ, जनता पार्टी आणि भाजपचे आमदार मावळच्या जनतेने निवडून दिले आहेत. संघटनेच्या ताकदीवर लोकप्रतिनिधी निवडून देणारा मतदारसंघ म्हणून मावळ तालुका ओळखला जातो. त्यामुळे परंपरागत बालेकिल्ला असलेला मावळ मतदारसंघ भाजपला मिळावा म्हणून आम्ही आमच्या नेत्यांकडे आग्रहाची मागणी करणार आहोत.