नारायणगाव : कोथिंबीर आणि मेथीची अचानक वाढलेली आवक आणि पावसामुळे मागणी घटल्याने जुन्नर कृषी बाजार समितीच्या नारायणगाव उपबाजार केंद्रात कोथिंबीर जुडी ५० पैसे तर मेथीची जुडी १ रुपया झाली. त्यामुळे संतप्त झालेल्या शेतकऱ्यांनी शनिवारी नारायणगाव उपबाजार केंद्रात विक्रीसाठी आणलेल्या कोथिंबीर-मेथीच्या जुड्या फेकून दिल्या. बाजार समितीने उपबाजार केंद्रात पडलेल्या सुमारे ६० हजार कोथिंबीर आणि मेथीच्या जुड्या फेकून दिल्या.
हेही वाचा >>> पुणे : काकडी, फ्लॉवर स्वस्त, लसूण, कोबीच्या दरात वाढ
जुन्नर कृषी उत्पन्न बाजार समितीच्या नारायणगाव उपबाजार केंद्रात शनिवारी कोथिंबिरीची १ लाख ४९ हजार १०० जुडीची आवक झाली. कोथिंबिरीच्या शेकडा जुडीला ५१ रुपये ते १८०१ रुपये भाव होता, मेथीची १ लाख ६२ हजार ६०० जुडीची आवक होऊन शेकडा बाजारभाव १०१ ते ९०१ रुपये बाजारभाव होता, तर शेपूच्या १३ हजार ४०० जुडींची आवक होऊन शेकडा जुडी ३०१ ते १२०१ रुपये बाजारभाव होता. एकूण ३ लाख २५ हजार १०० जुडींची आवक झाल्याने आणि मुंबईमध्ये संततदार पावसामुळे भाजीपाल्याची मागणी कमी झाल्याने व्यापाऱ्यांनी भाजीपाला खरेदी बंद केली. खरेदी होत नसल्याने आणि गाडीभाडे वसूल न झाल्याने संतप्त शेतकऱ्यांनी विक्रीसाठी आणलेली कोथिंबीर आणि मेथी बाजार समिती आवारातच फेकून दिली. त्यानंतर उपबाजार केंद्रात पडलेल्या ६० हजार कोथिंबीर आणि मेथीच्या जुड्या बाजार समितीने अखेर फेकून दिल्या.