कल्याण – ग्राहकांना वीज देयकाचा भरणा करणे अधिक सुलभ व्हावे, यासाठी सुट्टीच्या दिवशीही वीज देयक भरणा केंद्रे सुरू ठेवण्याचा निर्णय महावितरणच्या कल्याण परिमंडलाने घेतला आहे. कल्याण परिमंडलांतर्गत सर्व अधिकृत वीजबिल भरणा केंद्रे शनिवार आणि रविवार (२९ ते ३० जून) या सुटीच्या दिवशी सुरु राहतील. उपलब्ध सुविधेचा लाभ घेऊन वीज ग्राहकांनी आपल्या चालू वीज देयकासह थकबाकीचा भरणा करून सहकार्य करण्याचे आवाहन कल्याण परिमंडलाचे मुख्य अभियंता चंद्रमणि मिश्रा यांनी केले आहे.
वीज देयक थकबाकी कमी करण्यासाठी थकबाकीदारांचा वीजपुरवठा खंडित करण्याची धडक मोहीम कल्याण परिमंडलात सुरू आहे. सुट्टीच्या दिवशीही ही मोहीम सुरू राहणार असून संभाव्य गैरसोय टाळण्यासाठी थकबाकीचा त्वरित भरणा करण्याचे आवाहन महावितरणने केले आहे. अधिकृत वीज देयक भरणा केंद्रासह महावितरणचे मोबाईल ॲप, http://www.mahadiscom.in हे संकेतस्थळ तसेच विविध पेमेंट वॉलेटचा उपयोग करून घरबसल्या विजबिलाचा ऑनलाईन भरणा करण्याची सुविधाही ग्राहकांना उपलब्ध आहे.
हेही वाचा >>>ठाणे : पावसाळा सुरु होताच प्रवाशांचे हाल सुरु; शहरात रिक्षांचा तुटवडा
ग्राहकांनी अखंडित वीज सेवेसाठी उपलब्ध सुविधांचा उपयोग करून चालू व थकीत वीजबिलाचा भरणा करून सहकार्य करावे, असे आवाहन महावितरणने केले आहे.
© The Indian Express (P) Ltd