कल्याण – टिटवाळा पूर्व भागातील गणेशनगर, आर. के. नगर परिसरात भूमाफियांनी उभारलेल्या ४० हून अधिक बेकायदा चाळी, चाळींचे जोते अ प्रभागाच्या तोडकाम पथकाने साहाय्यक आयुक्तांच्या उपस्थितीत भुईसपाट केले. टिटवाळा, मांडा परिसरातील बेकायदा चाळींच्या बाबतीत पालिकेत तक्रारी वाढल्याने या बेकायदा चाळी जमीनदोस्त करण्याची मोहीम सुरू करण्यात आली आहे.
टिटवाळा पूर्व भागातील गणेशनगर, आर. के. नगर भागात सर्वाधिक बेकायदा चाळी, या भागात चाळी उभारणीसाठी नवीन जोती बांधण्याची कामे मोठ्या प्रमाणात सुरू असल्याची माहिती अ प्रभागाचे साहाय्यक आयुक्त संदीप रोकडे यांना मिळाली होती. या बेकायदा चाळींची प्रत्यक्ष पाहणी करून झाल्यानंतर आयुक्त डाॅ. इंदुराणी जाखड यांच्या आदेशावरून अतिक्रमण नियंत्रण उपायुक्त अवधूत तावडे यांच्या मार्गदर्शनाखाली साहाय्यक आयुक्त रोकडे, अधीक्षक नंदकिशोर वाणी यांच्या तोडकाम पथकाने गणेशनगर, आर. के. नगर भागात जाऊन तेथील बेकायदा चाळी जेसीबीच्या साहाय्याने भुईसपाट केल्या. यामध्ये ४० हून अधिक चाळी आणि जोत्यांची बांधकामे तोडण्यात आली.
टिटवाळा भागातील बनेली, बल्याणी भागात गेल्या दहा वर्षांच्या काळात याभागातील टेकड्या, डोंगर खोदून भूमाफियांनी बेकायदा चाळी उभारल्या आहेत. टिटवाळा भागात बेकायदा बांधकामांच्या विरोधात जोरदार तोडकाम मोहीम सुरू झाल्याने भूमाफियांमध्ये अस्वस्थता पसरली आहे.
हेही वाचा – “सामाजिक परिवर्तनात साहित्यिकांची भूमिका महत्वाची”, प्राध्यापक संतोष राणेंचं वक्तव्य
टिटवाळा, मांडा परिसरात उभारण्यात आलेल्या बेकायदा चाळी तोडण्याची मोहीम सुरू करण्यात आली आहे. टप्प्याटप्प्याने ही बेकायदा चाळी, गाळ्यांची बेकायदा बांधकामे जमीनदोस्त केली जातील. काही चाळींमध्ये रहिवास असल्याने ही बांधकामे पावसाळ्या संपल्यानंतर तोडण्याची मोहीम सुरू केली जाईल. प्रभागात एकही नवीन बेकायदा बांधकाम उभे राहणार नाही याची दक्षता घेतली जाणार आहे. – संदीप रोकडे, साहाय्यक आयुक्त, अ प्रभाग, टिटवाळा.
© The Indian Express (P) Ltd