Rain Updates: अयोध्येत राम मंदिरापाठोपाठ श्रीराम रुग्णालयालाही पावसाचा फटका; Video मध्ये पाहा दयनीय अवस्था

राम मंदिरातील अभिषेक सोहळ्याआधी शहरात पायाभूत सुविधा प्रकल्पांसाठी बांधकाम करण्यात आले होते. या सगळ्या बांधकामांसाठी हा पहिलाच पावसाळा आहे. दुर्दैवाने अनेक बांधकामांना पावसाचा फटका बसल्याचे दिसतेय. आज, शनिवारी २९ जूनला सकाळी पीटीआयने शेअर केलेल्या व्हिडीओमध्ये तर अयोध्येतील श्री राम रुग्णालयाच्या आवारात सुद्धा पावसाचे पाणी साचल्याचे दिसतेय. या साचलेल्या पाण्यातून लोक सुद्धा चालताना दिसत आहेत.

दुसरीकडे, अयोध्येच्या राम मंदिरात रामलल्लाची मूर्ती ज्या गाभाऱ्यात ठेवली आहे तिथे सुद्धा पहिल्या पावसात गळती सुरु झाली आहे. फक्त राम मंदिराच्या गाभाऱ्यातच नाही तर अन्य ठिकाणी देखील गळती होत आहे. या गळतीची चौकशी होणं अपेक्षित आहे. बांधकामावेळी नेमकी काय चूक झाली. याची माहिती घेणं आवश्यक आहे. यावर उपाययोजना न केल्यास मंदिरात पूजा करणे कठीण होईल, असं महंत सत्येंद्र दास यांनी म्हटलं होतं.

तर राम मंदिरातील गळतीच्याबाबत मंदिर निर्माण समितीचे अध्यक्ष नृपेंद्र मिश्रा यांनी उत्तर देत म्हटले की, “मी स्वत: राम मंदिराच्या पहिल्या मजल्यावर पावसाच्या पाण्यामुळे गळती होताना पाहिली आहे. दुसऱ्या मजल्यावर बांधकाम चालू असल्याचे ही गळती होत आहे कारण मुळात संपूर्ण छत मोकळं आहे. त्यामुळे तिथे पाणी साठलं आणि मंदिराच्या छतामधून गळती होत आहे. लवकरच छत पूर्ण झाकले जाईल व हा प्रश्न सुटेल. आता राहिला प्रश्न मंदिराच्या गाभाऱ्यातून पाणी काढण्याचा तर त्यासाठी वेगळी व्यवस्था केलेली नाही, पाणी हातानेच काढावं लागतं. मंदिरात तसा उतार असल्याने ही पाणी भरण्याची समस्या येत नाही पण गाभाऱ्यात सध्या ही अडचण आहे. पण विश्वास ठेवा मंदिर निर्मितीमध्ये कमतरता नाही.”