Nvidia च्या अब्जाधीश CEO चं लिंक्डइन प्रोफाईल व्हायरल; पूर्वानुभव म्हणून ‘डिशवॉशर’ असल्याचा उल्लेख!

लिंक्डइन या सोशल मीडिया प्लॅटफॉर्मवर प्रामुख्याने व्यावसायिक स्वरूपाच्या अपडेट्स, रोजगारासंदर्भातल्या पोस्ट आणि तत्सम इतर अपडेट्स शेअर होत असतात. त्यामुळे अगदी नोकरीच्या शोधात असणाऱ्या तरुण मंडळींपासून बाजारपेठेतील दिग्गजांपर्यंत सर्वांचे प्रोफाईल त्यांच्याविषयीची व्यावसायिक स्वरूपाची माहिती पुरवत असतात. अशाच बलाढ्य दिग्गजांपैकी एक असणारे Nvidia चे सीईओ जेन्सन ह्युआंग यांचं प्रोफाईल सध्या भलतंच चर्चेत आलं आहे.

डिशवॉशर, वेटर म्हणून पूर्वानुभव!

अब्जावधींची संपत्ती गाठीशी असणारे Nvidia चे सीईओ ह्युआंग यांचा लिंक्डइन प्रोफाईल म्हणजे डझनभर कंपन्यांमधला अनुभव, महत्त्वाच्या पदांच्या जबाबदाऱ्या आणि भरगच्च असा पूर्वानुभवाचा रकाना अशा गोष्टींची साधारण कल्पना केली जाऊ शकते. पण वास्तवात ह्युआंग यांच्या लिंक्डइन प्रोफाईलवर फक्त दोन ठिकाणी काम केल्याचा पूर्वानुभव नमूद केला आहे.

जेन्सन ह्युआंग यांच्या लिंक्डइन प्रोफाईलवरील पूर्वानुभवाच्या रकान्यात त्यांनी डिशवॉशर, बसबॉय आणि वेटर म्हणून काम केल्याचा उल्लेख आहे. १९७८ ते १९८३ या पाच वर्षांत डॅनीज नावाच्या एका हॉटेलमध्ये ह्युआंग यांनी हे काम केलं होतं. त्यानंतरचा त्यांचा अनुभव थेट एनविडियाचे संस्थापक व सीईओ म्हणून आहे. १९९३ सालापासून त्यांनी एनविडियाचे सीईओ म्हणून काम केलं असून त्यांचा आत्तापर्यंतचा एनविडियामधला अनुभव तब्बल ३१ वर्ष ८ महिने इतका नोंदवण्यात आल्याचं त्यांच्या प्रोफाईलवरून दिसत आहे.

विश्लेषण: Nvidia च्या उत्तुंग भरारीचे गमक कशात?

६१ वर्षीय जेन्सन ह्युआंग यांनी याआधी अनेकदा त्यांच्या पूर्वायुष्याबाबत खुलासे केले आहेत. या वर्षी मार्च महिन्यात ह्युआंग यांनी स्टॅनफोर्ड ग्रॅज्युएट स्कूल ऑफ बिझनेसमध्ये दिलेल्या मुलाखतीमध्ये डॅनीजसाठी काम केल्याच्या अनुभवाचा उल्लेख केला. “माझ्यासाठी कोणतंही काम छोटं नाही. कारण मी डिशवॉशर म्हणून काम केलं आहे. मी शौचालयं साफ करायचो. मी खूप सारी शौचालयं साफ केली आहेत. तुम्ही सगळ्यांनी मिळूनही जेवढी केली नसतील, तेवढी मी साफ केली आहेत”, असं त्यांनी म्हटलं होतं.