वसई:- समाज माध्यमांवर हल्ली रील ची खूपच क्रेझ निर्माण झाली आहे. मात्र वसईच्या एका तरुणाने व्हायरल केलेल्या रीलने तर कमालच केली आहे.या रील मुळे दोन वर्षांपूर्वी हरवलेल्या २५ वर्षीय मनोरुग्ण तरुणाचा शोध त्यांच्या कुटुंबाला लागला आहे.
नालासोपारातील यश माने याने दिवाळीमध्ये वसई विरार परिसरातील तीन हजार बेघर, अनाथ मुलांना मिठाईचे वाटप केले होते. १९ ऑक्टोंबर रोजी विरार पश्चिम जकात नाका येथे रात्री साडे अकराच्या सुमारास तो मिठाई वाटप करत होता. यावेळी एका पंचवीस वर्षीय भिकारी अवस्थेत असलेल्या मनोरुग्ण तरुणाला तेथील काही लोक हाकलून देत त्याला त्रास देत होते. त्यावेळी यश याने त्याला वाचविले होते.
त्यानंतर त्याचा व्हिडिओ काढून फेसबुक व इंस्टाग्राम या समाजमाध्यामावर प्रसारित केला होता. हाच विडिओ सर्वत्र प्रचंड व्हायरल झाला होता. हाच व्हिडीओ त्या मनोरुग्ण तरुणाच्या कर्नाटकातील गावातही पोहोचला.कर्नाटकातील बेल्लारी येथील जुनी मस्सीज, हागरीबोम्मनहल्ली येथे राहणाऱ्या खसीम बंडी यांनी हा व्हिडिओ बघितला आणि त्यांच्या पायाखालची जमीन सरकली.दोन वर्षांपूर्वी त्यांचा मुलगा सलीम घरातून कोणाला काहीही न सांगता निघून गेला होता. घरच्यांनी शोध घेतल्यानंतर ही न सापडल्याने तो बेपत्ता असल्याची तक्रार जवळच्या पोलीस ठाण्यात दिली होती.
मात्र दोन वर्षांपासून तो बेपत्ता असल्याने आपला मुलगा या जगात नाहीच अशी समजूत करून घेतली होती.
व्हिडिओ मधून पटली ओळख
व्हायरल झालेली व्हिडीओ त्यांच्या कुटुंबाने पुन्हा पुन्हा पाहिली, या व्हिडिओत दिसणारा मुलगा हा हरवलेला सलीम असल्याचे लक्षात येताच त्यांनी तातडीने थेट इंस्टाग्राम अकाउंट वरील नंबरवर संपर्क केला होता. यश माने यांनी हा तुमचा मुलगा असेल तर तसे पुरावे घेऊन मुंबईला असे त्याने सांगितले होते. तोपर्यंत मी काळजी घेतो. खसीम बंडी हे आपल्या नातेवाईकांना घेऊन मंगळवारी मुंबईत विरार मध्ये दाखल झाले.
विरार स्थानकात यश माने यांनी त्यांना घेऊन सलीमला सुरक्षीत ठेवलेल्या जकात नाका परीसरात नेले.तब्बल दोन वर्षानंतर आपल्या मुलाला पाहिल्यानंतर खसीम यांनी सलीमला कडकडून मिठी मारली आणि त्यांच्या डोळ्यातून आनंदाश्रू वाहू लागले.सलीमनेही मायेचा स्पर्श अनुभवल्यानंतर तो ही रडू लागला. यश याने त्यांना बोळींज पोलीस ठाण्यात नेऊन मनोरुग्ण सलीम हाच कर्नाटकातील खसीम बंडी यांचा मुलगा असल्याचे निष्पन्न झाल्यानंतर कायदेशीर प्रक्रिया पूर्ण करून सलीम यांना त्यांच्या कुटुंबाच्या स्वाधीन केले असल्याचे यश माने यांनी सांगितले आहे.हरवलेला मुलगा सापडल्याने खसीम यांच्या कुटुंबाने आनंद व्यक्त केला आहे.
यशची हेलिकॉप्टर दादा अशी ओळख
विमानात किंवा हेलिकॉप्टरमधून प्रवास करण्याची इच्छा प्रत्येकालाच असते. मात्र, गरीब आणि ज्यांची आर्थिक स्थिती नसते त्यांच्यासाठी हे स्वप्नच असतं. हे स्वप्न फुटपाथवर राहणाऱ्या अनाथ मुलांच पूर्ण करणाऱ्या तरुणाचे नाव यश माने असे आहे. यश माने या तरुणाने आपल्या स्वत:च्या खर्चाने अनेक मुलांना हेलिकॉप्टरची सफर घडवून आणली आहे. त्यामुळे यशला परिसरात ‘हेलिकॉप्टर दादा’ या नावाने ओळखले जाते. याच यशमुळे कर्नाटकमधून बेपत्ता झालेला मुलगा त्यांच्या कुटुंबापर्यंत सुखरूप पोहचला आहे. यशने दाखविलेल्या सामाजिक बांधिलकीबद्दल सर्वच स्तरातून त्याचे कौतुक होत आहे.