Numerology And Names :अंकशास्त्र म्हणजे केवळ आकड्यांचा खेळ नाही, तर जीवनावर परिणाम करणारी एक सखोल विद्या आहे. प्रत्येक व्यक्तीच्या जन्मतारखेनुसार त्याचा एक मूलांक ठरतो आणि त्यावरून त्या व्यक्तीचा स्वभाव, विचारसरणी, भाग्य आणि भविष्यातील दिशा ओळखता येते. आज जाणून घेऊ या मूलांक १ (Mulank 1) असलेल्या मुलांसाठी कोणती अक्षरे ठेवावीत आणि कोणती टाळावीत.

मूलांक १ म्हणजे काय?

अंकज्योतिषानुसार ज्यांचा जन्म कोणत्याही महिन्याच्या १, १०, १९ किंवा २८ तारखेला झाला आहे, त्या व्यक्तींचा मूलांक १ असतो. या अंकाचा स्वामी ग्रह म्हणजे सूर्य. सूर्य हा तेज, उर्जा, नेतृत्व आणि आत्मविश्वासाचा अधिपती आहे. त्यामुळे या मूलांकाचे लोक जन्मतःच नेतृत्वगुणांनी युक्त असतात. त्यांच्यात पुढे जाण्याची तीव्र इच्छा असते आणि ते कोणत्याही क्षेत्रात आपलं वेगळं अस्तित्व निर्माण करतात.

स्वभाव आणि व्यक्तिमत्त्व

सूर्याच्या प्रभावामुळे मूलांक १ चे लोक उत्साही, आत्मविश्वासी आणि धैर्यवान असतात. त्यांना इतरांवर प्रभाव टाकायला आवडतं. अशा लोकांना समाजात आदर मिळतो आणि ते स्वतःचं साम्राज्य उभं करण्याची ताकद ठेवतात. मात्र, त्यांचा अहंकार कधी कधी त्यांच्यासाठी अडथळा ठरू शकतो. त्यामुळे त्यांची ऊर्जा योग्य दिशेने वापरणं अत्यंत महत्त्वाचं आहे.

नाव आणि मूलांक यांचं नातं

अंकज्योतिषात असं मानलं जातं की, प्रत्येक अक्षराचं स्वत:चं स्पंदन आणि ऊर्जा असते. जेव्हा एखाद्या मुलाचं नाव ठेवताना त्या नावाचं पहिलं अक्षर मूलांकाशी सुसंगत ठरतं, तेव्हा त्या मुलाच्या आयुष्यात संतुलन आणि यश प्राप्त होतं. उलट, जर अक्षर शत्रू मूलांकाशी संबंधित असेल, तर ते आयुष्यात संघर्ष आणि अडथळे निर्माण करतं.

हेही वाचा

मूलांक १ साठी अशुभ अक्षरे

मूलांक १ चा स्वामी सूर्य आहे आणि सूर्याचे शत्रू ग्रह आहेत राहू, शुक्र आणि शनि. या ग्रहांचे मूलांक अनुक्रमे ४, ६ आणि ८ आहेत. म्हणूनच या मूलांकांशी संबंधित अक्षरांनी सुरू होणारं नाव मूलांक १ साठी शुभ मानलं जात नाही.
राहूच्या प्रभावाखालील D, M, T, शुक्राच्या प्रभावाखालील U, V, W, आणि शनिच्या प्रभावाखालील F, P या अक्षरांनी सुरू होणारी नावे मूलांक १ साठी अशुभ ठरतात. या अक्षरांमुळे सूर्याची उर्जा कमी होते आणि व्यक्तीच्या आयुष्यात अनिश्चितता, अडथळे, मानसिक ताण, तसेच मेहनतीचा अपेक्षित परिणाम न मिळण्याची स्थिती निर्माण होते.

मूलांक १ साठी शुभ अक्षरे

सूर्याच्या तेजाला अनुकूल आणि सकारात्मक प्रभाव देणारी अक्षरे म्हणजे – A, I, J, Q, B, K, R, C, G, L, S, E, H, N, X.
या अक्षरांनी सुरू होणारी नावे मूलांक १ असलेल्या व्यक्तींना भाग्यवर्धक ठरतात. अशा नावांमुळे त्यांच्या व्यक्तिमत्त्वात तेज आणि आत्मविश्वास वाढतो. समाजात मान-सन्मान मिळतो आणि नेतृत्वक्षमता अधिक मजबूत होते. अनेकदा अशा लोकांना त्यांच्या करिअरमध्ये जलद प्रगती आणि प्रसिद्धी मिळते.

हेही वाचा

योग्य नावाचं महत्त्व

मुलाचं नाव केवळ ओळख नाही तर ती त्याच्या आयुष्याचा पाया ठरतो. विशेषतः जर तो मूलांक १ असलेला असेल, तर त्याच्या नावात सूर्याशी सुसंगत अक्षरांचा समावेश करणे अत्यंत आवश्यक आहे. योग्य अक्षराचं नाव ठेवल्यास सूर्याची सकारात्मक ऊर्जा त्या व्यक्तीला यश, कीर्ती आणि स्थैर्य देते.

मूलांक १ असलेले लोक हे सूर्याच्या तेजाचे प्रतीक असतात. त्यांच्या आयुष्यात ऊर्जा, आत्मविश्वास आणि नेतृत्व हे नैसर्गिकरित्या येतं. पण हे तेज योग्य प्रकारे संतुलित राहावं यासाठी नावाचं अक्षर महत्त्वाचं ठरतं. योग्य अक्षर निवडलं, तर नशिब उजळवतं आणि आयुष्याच्या प्रत्येक टप्प्यावर यश मिळवतं.