नफावसुलीने ‘सेन्सेक्स’ची २६४ अंशांनी गाळण

दिवसअखेर मुंबई शेअर बाजाराचा निर्देशांक सेन्सेक्स २६४.२७ अंशांनी घसरून ८५,५७१.८५ पातळीवर स्थिरावला. दिवसभरात त्याने १४२.१३ अंशांची कमाई करत ८५,९७८.२५ या सर्वोच्च शिखराला स्पर्श केला. मात्र, बँकिंग आणि ग्राहकोपयोगी कंपन्यांच्या समभागांमध्ये झालेल्या घसरणीने दुपारच्या सत्रात निर्देशांकाने नकारात्मक पातळीत प्रवेश केला. सलग सहा सत्रातील तेजीनंतर राष्ट्रीय शेअर बाजाराचा निर्देशांक निफ्टी ३७.१० टक्क्यांनी घसरला आणि तो २६,१७८.९५ पातळीवर बंद झाला.

हेही वाचा >>>Aakriti Chopra Resings Zomato : झोमॅटोच्या सहसंस्थापक आकृती 

अलीकडील विक्रमी तेजीनंतर, अनुकूल जागतिक संकेतांना न जुमानता गुंतवणूकदारांनी नफावसुलीला प्राधान्य दिले. मात्र माहिती तंत्रज्ञान क्षेत्रातील कंपन्यांसाठी तिमाहीतील कामगिरी सकारात्मक राहण्याच्या आशावादाने निर्देशांकातील घसरण मर्यादित राहिली. निर्देशांकात सर्वाधिक योगदान देणाऱ्या कंपन्यांच्या समभागांमधील संमिश्र कामगिरीमुळे बाजाराची गती कमी झाली, असे मत जियोजित फायनान्शियल सर्व्हिसेसचे संशोधन प्रमुख विनोद नायर यांनी व्यक्त केले.

सेन्सेक्समध्ये पॉवर ग्रिड, आयसीआयसीआय बँक, भारती एअरटेल, एचडीएफसी बँक, कोटक महिंद्र बँक, लार्सन अँड टुब्रो, अदानी पोर्ट्स आणि अल्ट्राटेक सिमेंट या कंपन्यांच्या समभागात घसरण झाली. तर सन फार्मा, रिलायन्स इंडस्ट्रीज, टायटन, एचसीएल टेक्नॉलॉजीज आणि बजाज फिनसर्व्ह यांचे समभाग तेजीसह बंद झाले.

सेन्सेक्स ८५,५७१.८५ -२६४.२७ (-०.३१%)

निफ्टी २६,१७८.९५ -३७.१० (-०.१४%)

डॉलर ८३.७० ४

तेल ७१.५८ -०.०३