Zohran Mamdani : अमेरिकेमधील न्यूयॉर्कमध्ये महापौरसाठीच्या निवडणुका पार पडल्या आहेत. या निवडणुकीत डेमोक्रॅटिक पक्षाचे नेते आणि भारतीय वंशाचे नागरिक जोहरान ममदानी यांचा मोठा विजय झाला आहे. न्यूयॉर्क शहराच्या महापौरपदाच्या निवडणुकीच्या आधी अमेरिकेचे राष्ट्राध्यक्ष डोनाल्ड ट्रम्प यांनी जोहरान ममदानी यांना थेट विरोध केला होता. तसेच जर या निवडणुकीत जोहरान ममदानी हे निवडून आले तर आपण न्यूयॉर्क शहराला निधी देणार नाही, असा इशारा ट्रम्प यांनी दिला होता. मात्र, आता न्यूयॉर्कच्या महापौरपदाच्या निवडणुकीत जोहरान ममदानी यांचा विजय झाल्यामुळे ट्रम्प आता खरंच न्यूयॉर्कला निधी देणार नाहीत का? असा सवाल विचारला जात आहे.
डोनाल्ड ट्रम्प काय म्हणाले होते?
“ममदानी हे न्यूयॉर्क शहरातील स्वयंघोषित कम्युनिस्ट आहेत. ते जर महापौरपदाची निवडणूक जिंकले तर त्यांना वॉशिंग्टनकडून विरोधाचा सामना करावा लागेल. न्यूयॉर्क सारख्या महान शहराच्या महापौराने इतिहासात कधीही वॉशिंग्टनशी वैर घेतलं नव्हतं. मात्र ममदानी यांच्यामुळे अनेक प्रश्न निर्माण होतील. लक्षात ठेवा, महापौर म्हणून निवडून आल्यावर त्यांना त्यांच्या कम्युनिस्ट आश्वासनांची पूर्तता करण्यासाठी माझ्याकडूनच निधीची गरज भासेल. त्यांना अजिबात निधी दिला जाणार नाही. मग त्यांना मतदान करण्यात काय अर्थ आहे? ही विचारसरणी हजारो वर्षांपासून अपयशी ठरत आली आहे. ती पुन्हा अपयशी ठरेल आणि हे होईलच”, असं डोनाल्ड ट्रम्प यांनी म्हटलं होतं.
ममदानी यांनीही दिलं होतं प्रत्युत्तर
डोनाल्ड ट्रम्प यांच्या पोस्टला उत्तर देत असताना जोहरान ममदानी म्हणाले होते, “माझ्या विजयाच्या शक्यतेमुळे ट्रम्प यांना खूप दुःख झाल्याचं दिसतं.” तसेच निधी कपातीच्या डोनाल्ड ट्रम्प यांच्या विधानावर बोलताना ममदानी यांनी म्हटलं होतं की, “हे केवळ राजकीय नाटक आहे.”
न्यूयॉर्कला मिळाला भारतीय वंशाचा महापौर
न्यूयॉर्क शहराच्या महापौरपदाच्या निवडणुकीत जोहरान ममदानी यांचा मोठा विजय झाला आहे. डोनाल्ड ट्रम्प यांनी ममदानी यांना उघड विरोध केला होता. बुधवारी सकाळी ममदानी विजयी झाल्याचे जाहीर करण्यात आले. या निवडणुकीत त्यांनी अपक्ष उमेदवार आणि माजी गव्हर्नर अँड्रयू कुओमो, तसेच रिपब्लिकन पक्षाचे उमेदवार कर्टिस स्लिवा यांचा पराभव केला. मंगळवारी मतदानासाठी मतदार मोठ्या संख्येने बाहेर पडले. शहर निवडणूक मंडळाच्या मते २० लाखांहून अधिक मतदारांनी मतदानाचा हक्क बजावला. १९६९ नंतर पहिल्यांदाच असे घडले आहे, असे द इंडियन एक्सप्रेसने दिलेल्या वृत्तात म्हटले. जोहरान ममदानी यांना ९,४८,२०२ मते (५०.६ टक्के) मिळाली. अपक्ष उमेदवार अँड्रयू कुओमो यांना ७,७६,५४७ (४१.३ टक्के) आणि कर्टिस स्लिवा यांना १,३७,०३० इतके मतदान झाले.
जोहरान ममदानी कोण आहेत?
-जोहरान ममदानी यांच्या आई-वडिलांचा जन्म भारतातील आहे. त्यांचे वडील महमूद ममदानी युगांडात शिक्षणतज्ज्ञ आहेत आणि आई मीरा नायर भारतीय चित्रपट निर्मात्या आहेत.
-जोहरान यांचा जन्म आणि संगोपन युगांडातील कंपाला येथे झाले आहे.
-ते सात वर्षांचे असताना आपल्या पालकांसह न्यू यॉर्कला स्थलांतरित झाले.
-२०१८ मध्ये त्यांना अमेरिकन नागरिकत्व मिळाले आणि त्यांनी या वर्षाच्या सुरुवातीला सीरियन कलाकार रामा दुवाजीशी लग्न केले.
जोहरान ममदानी यांनी अमेरिकेमधील मेन राज्यातील बोडोइन कॉलेजमधून आफ्रिकाना स्टडीजमध्ये बॅचलर पदवी मिळवली आहे. राजकारणात येण्यापूर्वी त्यांनी एक सल्लागार म्हणून काम केले आणि कमी उत्पन्न असलेल्या घरमालकांना बेदखल होण्यापासून रोखण्यास मदत केली आहे, असे न्यू यॉर्क असेंब्लीच्या वेबसाइटवरील त्यांच्या अधिकृत प्रोफाइलमध्ये नमूद करण्यात आले आहे. २०२० मध्ये त्यांनी विधानसभा निवडणुकीत विजय मिळवला. त्यापूर्वी ममदानी यांनी रॅप आणि लेखन क्षेत्रातही काम केले आहे.